बैतडीको पुर्चौडीमा ट्याक्टर दुर्घटना, चालकको घटनास्थलमै मृत्यु

धनगढी: बैतडीको पुर्चौडी नगरपालिकामा भएको ट्याक्टर दुर्घटनामा चालकको मृत्यु भएको छ।

पुर्चौडी नगरपालिका-१ राताशिलामा बिहीबार भएको दुर्घटनामा ४४ वर्षीय ट्याक्टर चालक देवसिंह भण्डारीको मृत्यु भएको हो।

बिहीबार दिउँसो करिब साढे ३ बजे पुरघाट ढोल्यामोडतर्फ जाँदै गरेको सु.प्र.प्र.०२-००१ त १६०० नम्बरको ट्याक्टर अनियन्त्रित भई सडकबाट करिब २०/२५ मिटर तल खसेर दुर्घटना भएको प्रहरीले जनाएको छ।

दुर्घटनामा पुर्चौडी नगरपालिका-१ बुदडा घर भई हाल महेन्द्रनगर बस्दै आएका चालक भण्डारीको घटनास्थलमै मृत्यु भएको हो।

ट्याक्टरमा चालकबाहेक अन्य कोही सवार नरहेको बताइएको छ। घटनास्थलमा पुरघाट प्रहरी चौकी बैतडीबाट प्रहरी टोली खटिएको छ।