बेलौरीमा एसईई आइडलको अडिसन सम्पन्न
कञ्चनपुरः सुदुरपश्चिम प्रदेश स्तरीय नृत्य र गायन विधाको प्रतियोगिता एसईई आइडल ३ का दुई अडिसन कञ्चनपुरको बेलौरी नगरपालिकामा शिक्षा शाखाको समन्व्यमा आज सम्पन्न भएका छन्। बेलौरीको जवदियामा रहेको लक्ष्मी माध्यमिक विद्यालयमा आइइलको तेह्रौं र र बेलौरी बजारमा रहेको महाकाली माध्यमिक विद्यालयमा चौधौं अडिसन सम्पन्न भएका हुन्।
आज भएको चौधौं अडिसनमा बेलौरी नगरपालिकामा शिक्षा शाखाका निमित्त प्रमुख अमितप्रसाद भट्टले शिक्षा शाखाको समन्व्यमा बेलौरीमा यस्तो कार्यक्रम गर्न पाउँदा खुसी व्यक्त गर्दै कार्यक्रमलाई निरन्तरता र स्तरीयता दिनु पर्ने कुरामा जोड दिए। तेह्रौं अडिसनमा बोल्दै लक्ष्मी मा.वि.का प्र.अ. विरेन्द्र सिंह भण्डारीका यस्तो कार्यक्रम विद्यालयमा अपरिहार्य भएको बताए भने चौधौं अडिसनमा बोल्दै महाकाली मा.वि.का प्र.अ. रमेश सिंह भण्डारीले एसईईका विद्यार्थीहरुका लागि मात्र नभएर अन्य तहका विद्यार्थीहरुका लागि पनि यस्तै कार्यक्रम आयोजना गर्न आयोजकसँग आग्रह गरे।
नृत्य र गायन विधाको प्रदेश स्तरीय प्रतियोगिता प्रदेश युवा परिषद् एसईई आइडलका अडिसन धमाधम आयोजना हुने क्रममा आज मिलन स्कुलमा बाह्रौँ अडिसन सम्पन्न भएको हो। कार्यक्रममा बोल्दै विद्यालयका प्रिन्सिपल सिताराम बुढाथोकीले विद्यार्थीलाई पढाईसँग उनीहरुमा भएका फरक क्षमताको पहिचान र अभिवृद्धि हुनु पर्ने कुरामा जोड दिए। एसईई आइडल ३ का सुदुरपश्चिमका ९ वटै जिल्लाका ३० भन्दा बढी स्थानहरुमा अडिसन गरिनेछ। यस वर्ष एसईई दिने विद्यार्थीहरुले अडिसनमा सहभागी हुन पाउनेछन्। यस वर्ष पनि गत बर्ष जस्तै नृत्य र गायन प्रतिभाहरुले आफ्नो प्रतिभा प्रदर्शन गर्न पाउनेछन्।
असोज देखि फाल्गुण सम्म सुपमा ९ जिल्ला भरि नै अडिसन प्रतियोगिताहरु संचालन हुनेछन् जहाँबाट नृत्य र गायन विधाका उत्कृष्ट ३०–३० जना प्रतिस्पर्धिहरुले २०८१ बैशाखमा हुने दोस्रो चरणमा प्रवेश पाउनेछन् भने दोस्रो चरणमा उत्कृष्ट हुने नृत्य र गायन विधाबाट १५–१५ जना प्रतिस्पर्धीहरुले २०८१ असार १ गते हुने फाईनलमा प्रवेश पाउनेछन्। फाईनलबाट दुवै विधामा १–१ जना विजेता र १–१ जना उपविजेता बन्नेछन्। दुवै विधाका विजेता र उप विजेताले क्रमशः ५०–५० हजार र २५–२५ हजार सहित कक्षा ११ र १२ मा पूर्ण छात्रवृत्ति पाउनेछन्। साथै दुवै विधाका उत्कृष्ट ५ भित्र पर्ने अन्य प्रतिस्पर्धिहरुले कक्षा ११–१२ मा आंशिक छात्रवृत्ति पाउनेछन्।
