नवलपरासीमा पनि लिइयो पल शाहको बयान

काठमाडौँः नाबालिगलाई बलात्कार गरेको आरोप लागेका कलाकार पल शाहले बुधबार कावासोतीस्थित सरकारको वकिलको कार्यालयमा आफ्नो बयान दिएका छन्। तनहुँ प्रहरीमा ती नाबालिग किशोरीमाथि नै बलात्कार गरेको आरोपमा अनुसन्धानका लागि थुनामा रहेका पल शाहलाई मंगलबार अर्को किटानी जाहेरीमा बयानका लागि कावासोती पुर्‍याइएको हो।

पूर्वी नवलपरासी प्रहरी कार्यालयका प्रवक्ता दिलीप गिरीले कलाकार शाहलाई थप एक सातासम्म अनुसन्धानका लागि कावासोतीमै राखिनेछ। ती नाबालिगले एउटा गीत छायांकनका क्रममा गत चैत ७ गते गैँडाकोटको एउटा होटलमा आफूलाई चाहिनेभन्दा बढी समय राखेर बलात्कार गरेको भन्दै इलाका प्रहरी कार्यालय गैंडाकोटमा दुई साताअघि किटानी जाहेरी दिएकी थिइन्।