प्रधानमन्त्री कप छनोट क्रिकेटः बैतडी फाइनलमा
बैतडी: बैतडीको पुरुष टोली प्रधानमन्त्री कप एकदिवसीय राष्ट्रिय क्रिकेट प्रतियोगिताको सुदूरपश्चिम प्रदेश स्तरीय छनोटको फाइनलमा प्रवेश गरेको छ। बैतडीले आजको खेलमा डडेल्धुरामाथि पाँच विकेटको सहज जित निकालेको हो। यसअघि बैतडीले बझाङलाई आठ विकेट र दार्चुलालाई १२८ रनले हराएको थियो।
खराब मौसमका कारण आजको खेल २० ओभरमा छोट्याइएको थियो । टस जितेर पहिला ब्याटिङ गरेको डडेल्धुराले पाँच विकेटको क्षतिमा १३६ रन बनायो। डडेल्धुराका लागि अर्जुन विकले ३७ र विशाल ऐरले ३७ रन बनायो। बलिङतर्फ बैतडीका गजेन्द्र बोहराले तीन, नरेन भट्ट र हिक्मत महराले एक–एक विकेट लिए।
एक सय ३७ रनको लक्ष्य बैतडीले १८ दशमलव एक ओभरमा पाँच विकेटको नोक्सानीमा भेट्टायो। बैतडीका लागि लोकेन्द्र चन्दले अर्धशतकीय पारी खेल्दै ५४ रनको योगदान दिए। उनी ‘प्लेयर अफ दी म्याच’समेत भए । यस्तै दीपक बोहराले अविजित ३१ र आयुश चन्दले अविजित ३० रन बनाए। बलिङतर्फ डडेल्धुराका अर्जुन विकले तीन तथा सुरज देउवा र सुवेशसिंह रावलले एक–एक विकेट लिए।
बैतडीले अब फाइनलमा शनिबार कञ्चनपुरको सामना गर्नेछ। सुदूरपश्चिम प्रादेशिक क्रिकेट सङ्घको आयोजनामा सञ्चालन भइरहेको प्रतियोगितामा प्रदेशका आठ जिल्ला सहभागी छन्।
