डडेल्धुरामा पुरुष भलिबल प्रतियोगिताको उपाधि जिएसएमले जित्यो
डडेल्धुराः डडेल्धुरामा सम्पन्न खुला पुरुष भलिबल प्रतियोगिताको उपाधि जिएसएम बिल्डर्स प्रालि अजयमेरुले जितेको छ।
शनिबार भएको फाइनल खेलमा अर्जुनवाण गण दह ब्यारेकलाई ३–२ को सेटमा पराजित गर्दै बिल्डर्सले उपाधि हात पारेको हो। उपाधिसँगै बिल्डर्सले ५५ हजार पाँच सय ५५ रुपैयाँ र दोस्रो स्थानमा चित्त बुझाएको अर्जुनवाण गणले २५ हजार पाँच सय २५ रुपैयाँ नगदसहित ट्रफी, मेडल र प्रमाणपत्र पाएको छ।
तृतीय मसन निशान्त कालीज फर्मले १५ हजार पाँच सय ५५ नगदसहित ट्रफी, मेडल र प्रमाणपत्र पाएको छ। जिएसएम बिल्डर्सका बलदेव धामी प्रतियोगिताको सर्वोत्कृष्ट खेलाडी घोषित भएका छन्। उनले पाँच हजार नगदसहित ट्रफी पाएका छन्।
यस्तै, प्रतियोगितामा बेस्ट ब्लकर जिएसएम बिल्डर्सका भरत विक, बेस्ट सेटर बिल्डर्सकै सागर जैरु, बेस्ट स्पाइकर अर्जुनवाण गणका आशिक सुनार र बेस्ट डिफेन्डर सुदीप छन्त्याल बनेका छन्। डडेल्धुरा जेसीजले आयोजना गरेको जेसीज सप्ताहअन्तर्गत बुधबारदेखि प्रतियोगिता सुरु भएको थियो।
