महिला यू–१९ क्रिकेट टोलीकी कप्तान पुजा महतो सम्मानित
काठमाडौँः महोत्तरीको जलेश्वरमा संघ संस्थाहरुले महिला यू–१९ क्रिकेट टोलीकी कप्तान पूजा महतोलाई सम्मान गरेका छन्। जलेश्वरमा सशस्त्र प्रहरीको ब्याण्ड सँगसँगै नगर परिक्रमा गर्दै स्थानीय, संघ संस्था र खेलप्रेमीले कप्तान महतोलाई शुक्रवार भव्य सम्मान गरेका हुन्।
जिल्ला प्रशासन कार्यालय महोत्तरीमा शुक्रवार आयोजित सम्मान समारोहमा जिल्ला क्रिकेट संघ महोत्तरी, जिल्ला प्रशासन कार्यालय, मटिहानि नगरपालिका, जलेश्वर नगरपालिका लगायतले नगद रकमसहित कप्तान महतोलाई सम्मान गरेका हुन्।
क्रिकेट संघ महोत्तरीले ५५ हजार ५ सय, मटिहानि नगरपालिकाले २५ हजार, जलेश्वर नगरपालिकाले २५ हजार र ओम अटो सेन्टरले ५ हजार १ सय नगदसहित कप्तान महतोलाई सम्मान गरेको क्रिकेट संघका केन्द्रीय उपाध्यक्ष रोशन सिंहले बताए। उनका अनुसार महोत्तरीका स्थानीय तह र संघ संस्थाले कप्तान महतोलाई हालसम्म ५ लाख ६१ हजार नगदसहित सम्मान गरेका छन्।
पूजाले महोत्तरी जिल्लालाई मात्रै नभएर देशलाई चिनाएकोले खेलाडीको मनोबल बढाउने उद्देश्यले सम्मान गरिएको हो। शुक्रवार बिहान महोत्तरी गाउँपालिकाका अध्यक्ष दिलीप पाण्डेले नगद ५१ हजारसहित प्रशंसापत्र र दोसल्ला ओढाएर सम्मान गरेका थिए।
