कोरोना भाईरसको प्रकोपबाट बच्न डोटेली भाषाको सन्देश
२०७६ चैत्र २५, १२:००
नमस्कार, आजभोल घातक कोरोनाभाइरस या कोभिड-१९ को प्रकोप छ, तबै हाम यिसा बगत आफु रे आफना परिवार लाइ सुरक्षित राख्दाइ केइ निर्देशनअन तम सँङ साँट्टारयाउँ। हाम ले विश्व स्वास्थ्य संगठनओ सार्वजनिक सल्लाग संक्षेप मी डोटेली भाषा मी प्रस्तुत अद्दा प्रयास अरिराखिछौंl
- दिन माइ बेरबेरी आफना हात साबुन पानि या ह्याण्डवास का झोलले निक्करी ( कम्तीमी २० सेकेन्ड ) उमासी उमासी बर धोः। अल्कोहल-आधारित स्यानिटाइजरओ प्रयोग अरः। साबुन या अल्कोहल ले तमरा हात मी हनसक्द्या भाइरसअन लाइ मारन्छ।
- घरै बस्याः। जरुड़ि नहुञ्ज्याँ तक्क भाइर जिन गयाः, आफुना रे तम ले भिट्याः कसै लै और मान्स का बीचः १ मिटर (३ फीट) कि दुरि राखः। तन लाइ जनछोः। भलै कोरोनाभारस हवा बठेइ नाइसद्दो, पुइ लै सङ्क्रमित मान्स ले काँसञ्ज्याँ या छिन्कञ्ज्याँ नजिक भया या छोया बटि सरन्छ। कसै लै मान्स लाइ हेरिबरे येइ का लक्षण पत्ता लौनाइ तति सजि आथिन क्याइ कि कसै लै मान्स लाइ काँसो लागिसकन्छ या छिन्का आइसकन्छ।
- क्याइ? जज्ज्याँ कोइ कासन्छ या छिन्कन्छ, नान-नाना छिटा नाक या मुख बठेइ बाइर आइसक्दान, रे तन छिटाअन मी भाइरस होइसक्दान। यदि कास्याँ मान्स लाइ यो रोग लाग्याः भया, तम भौती नजिक छः भँण्या, तम ले सास फेरञ्ज्याँ कोभिड-१९ भाइरस का सङ्ङै तन छिटा सास सित तमरा शरीर भितरि जाइसक्दान।
- हात ले ठउ-ठउरै छोयीन्छ, भाइरस भयाः कसै सतह मी छोयिया हात मी भाइरस आइसक्दान। तनै हात ले अँखा, नाक रे मुख छूञ्ज्याँ भाइरस हात बठेइ शरीर भितरि जाइसक्दान। तबै, हात ले मुखमँणि जनछोः।
- यदि तम लाइ छिन्का आयेले आफनो कुम मोणबर मुख रे नाक छोपः या टिशु पेपर मी छिन्का गरः। तै पछा टिशु पेपर लाइ उतन्ज्याँइ डस्टबिन मी खितिदिय।
- यदि तमलाइ जर, काँसो रे सास फेर्द्दाइ असजि होइरैछ भँण्या, झट्पट जाइबरे डाङ्टर लाइ धेकाइहालः। लकडाउन भयी ठउर छः भँण्या नजिक का अस्पताल मी फोन अरिबरे खबर अर:।
- कसै लै नौलि जानकारि कि न्युति तमरि ठउर का सरकारि निकाय का सूचना तथा घोषणा सुँणि रे हेरिहाल्याः।
- यदि तम अच्याल विदेश खास अरिबरे कसै कोभिड-१९ प्रभावित देशअन होइबटि या घुमिबटि आयाः भयाले स्थानिय अधिकारिइन लाइ जानकारि दिय। आफु लाइ और बठेइ छुटोइ राख रे यिथउथ और मान्सअन सँङ सम्पर्क रे भीटघाट जनअरः।
- केइ मान्स झुटि रैबार फैलौँन्नारयान। कोइ भँण्णारयान कि “कोभिड-१९ ले बुड़ापाकाअन मात्तरी बिमार पड्डान”, यिसो नाइ हो यै ले कोइ लै बिमार पड़िसक्दान।.
- कोइ भँण्णारयान कि गरम ले भाइरस लाइ मारन्छ तर येइ कुरड़ि का कोइ लै परमाण आथिन।.
- हाम लाइ मास्क ले मात्तरी भाइरल सङ्क्रमण बठेइ सुरक्षित नाइराखिसक्को पुइ लै कोइ सङ्क्रमित भइसक्याः या मेडिकल रेखदेख मी छः भँण्या मास्क को प्रयोग अद्दु निको हो। .
- घरायसि दबाइ रे जड़ामुड़ाअन ले तमरा शरीर कि प्रतिरक्षा प्रणालि लाइ तगड़ा बनाइबरे कसै लै रोग सित लड्डेइ क्षमता बड़न्छे, पुइ लै भाइरस लाइ माद्द नाइसक्को। आँजि लङ्ङ कोरोनाभाइरस को केइ लै उपचार आथिन।
- डरः जन। दिनदिनै नानबड़ो कसरत अरिहाल। सुन्तला, काग्जि जसा भिटामीन सी भयाः फलफूल खाः। यि सप्पै ले तमरि रोग सित लड्डेइ क्षमता को विकास अरन्छ।
- नौलो कोरोनाभाइरस मच्छर ले काटञ्ज्याँ नाइसद्दो।
- लसन, तुलसा, आदि खना ले मान्सअन लाइ कोरोनाभाइरस का प्रकोप बठेइ बचाइ राखिछ भँण्णेइ कुरड़ि का केइ लै परमाण आथिन।
· घरै बसः! स्वस्थ रह! सुरक्षित रह!
धन्यवाद!
अनुवादक :निराजन पन्त र जनक राज भट्ट (उनीहरु दुवैजना विकिपिडियाका स्वयमसेवक हुन्)
कमेन्ट लोड गर्नुस