काभा नेसन्स लिगमा नेपाल भारतसँग विजयी

काठमाडौंः काभा नेसन्स लिगमा नेपालले भारतलाई हराएको छ।

शनिवार त्रिपुरेश्वरस्थित राष्ट्रिय खेलकुद परिषद्को कभर्डहलमा भएको रोमाञ्चक खेलमा नेपालले भारतलाई ३–२ सेटले हराएको हो। नेपालले भारतलाई २५–१८, १२–२५, २५–१७, १८–२५, १५–१३ ले हरायो।

यसअघि नेपाल र भारतबीचको महिला भलिबलमा सबैभन्दा उत्कृष्ट प्रदर्शन २०१९ को सागको फाइनलमा दशरथ रंगशालामा थियो। उक्त खेलमा नेपाल ३–२ सेटले हार्दै स्वर्ण जित्नबाट चुकेको थियो।

नेपालले पहिलो खेलमा श्रीलंकालाई ३–० को सोझो सेटमा हराएको थियो। भारतले पहिलो खेलमा ईरानलाई ३–१ र दोस्रो खेलमा माल्दिभ्सलाई ३–० को सोझो सेटमा हराएको थियो। प्रतियोगितामा नेपालसहित भारत, इरान, माल्दिभ्स र श्रीलंकाको सहभागिता छ।