नेपाल आउँदै बलिउडका चर्चित गायक आतिफ असलम

काठमाडौँः बलिउडका चर्चित गायक आतिफ असलम नेपाल आउने भएका छन्। असलमले नयाँ वर्षको पूर्वसन्ध्यामा होटल ह्यात रिजेन्सीमा आयोजना हुने सांगीतिक कार्यक्रममा आफ्नो प्रस्तुति दिने जनाइएको छ। 

चैत ३० गते ‘आतिफ असलम लाइभ इन नेपाल’ मा प्रस्तुति दिने असलम त्यसको एक दिनअघि नै नेपाल आउँदै छन्। कार्यक्रम एमएन प्रोडक्सन र ट्यारिस इन्टरटेनमेन्टले गर्न लागेको हो। आयोजकका अनुसार केही दिनको नेपाल बसाइमा उनले विभिन्न पर्यटकीय स्थलको समेत भ्रमण गर्नेछन्।

सांगीतिक कार्यक्रमका लागि असलम दोस्रोपटक नेपाल आउन लागेका हुन्। उनी यसअघि सन् २०१२ मा दशरथ रंगशालामा भएको सांगीतिक कार्यक्रमका लागि नेपाल आएका थिए। आयोजकका अनुसार असलमको कार्यक्रममा नेपालका अन्य चर्चित कलाकारको समेत सहभागिता रहनेछ।