राष्ट्र बैंक आइतवारदेखि सुन र चाँदीका सिक्का बिक्री गर्दै
![](https://dineshkhabar.com/sites/default/files/styles/row_list/public/field/image/823-1698831337coin.jpg?itok=CbbgexuU)
काठमाडौँः यस वर्षको तिहारलाई लक्षित गर्दै नेपाल राष्ट्र बैंकले सुनका सिक्का (असर्फी) र चाँदीका सिक्का मेडालियन सर्वसाधारणलाई बिक्री गर्ने भएको छ। राष्ट्र बैंकले आउँदो आइतवार कार्तिक १९ देखि २४ गतेसम्म सिक्का बिक्री गर्ने बुधवार सूचनामार्फत जानकारी गराएको छ।
राष्ट्र बैंकले १० ग्राम, ५ ग्राम र २.५ ग्रामका सुनका सिक्का (असर्फी) र विभिन्न दरका गाई अंकित, गणेश अंकित र गजलक्ष्मी अंकित चाँदीका सिक्का बिक्री गर्न लागेको हो। नेपाल राष्ट्र बैंकले दसैंअघि (गत असोज ७ देखि) राष्ट्रिय जनावर गाईको चित्र अंकित मेडालियन सिक्काको बिक्री वितरण सुरु गरेको थियो। त्यसयता बबरमहलस्थित टक्सार महाशाखाले १० र २५ ग्रामका चाँदीका मेडालियन सिक्का टकमरी गरी बिक्री गरिरहेको छ।
दर उल्लेख नगरी निस्कासन गरिएको सिक्कालाई मेडालियन भनिन्छ। १० ग्राम सिक्काको मूल्य १ हजार ६ सय रुपैयाँ र २५ ग्राम सिक्काको मूल्य ४ हजार रुपैयाँ तोकिएको छ। राष्ट्र बैंकसँग मौज्दात रहेको चाँदीलाई गलान गरी मेडालियन सिक्का टकमरी गरिएको महाशाखाले जनाएको छ। दुवै प्रकारका सिक्कामा ९९९ टचको चाँदी प्रयोग गरिएको राष्ट्र बैंकको दाबी छ।
![cp](https://dineshkhabar.com/sites/default/files/WhatsApp_Video_2023-06-04_at_12_04_26_PM_AdobeExpress (2).gif)
![add (golden walk)](https://dineshkhabar.com/sites/default/files/1720425056360.jpg)
![Sonalika](https://dineshkhabar.com/sites/default/files/Sonalika-Tractors-ko-web-banner-giff.gif)