मुसाफिर

-श्लोक एस

म हिँड्दै छु चुनौतीको मुहान बोकेर,
न खरिद न विक्री हुने इमान बोकेर,
गुम्सिएका शब्द, आँखामा अडिएका आँसु, 
केही चोटका खत अनि ओठमा मुस्कान बोकेर ।
 
मेरो हिस्साको शुन्यता सबै, 
मेरो हिस्साको कोलाहल सँगै, 
बाँड्दैछु सारा एकमुस्ट, 
मभित्रको देउता मभित्रको शैतान बोकेर ।

रूखो बोली मन पवित्र,
खुशी मात्र खोज्ने दरिद्र,
नबोलिएका शब्द अनि, 
मारिएका रहर मभित्र,
एउटा यात्रा, 
केही पाइला धर्ती, 
एक मुठ्ठी साँस र जिन्दगी एक थान बोकेर, 
मभित्रको स्वर्ग मभित्रको श्मशान बोकेर ।