गोदावरी नगरपालिकाका अधिकृत खगेन्द्र चौधरीको निधन, सोमबार शोक बिदा
धनगढीः कैलालीको गोदावरी नगरपालिकामा आर्थिक प्रशासन शाखामा अधिकृत (छैटौँ तह) का रूपमा कार्यरत खगेन्द्र प्रसाद चौधरीको निधन भएको छ। सोमबार बिहान घरमै एक्कासि बेहोस भएर ढलेका चौधरीलाई उपचारका लागि नवजीवन अस्पताल धनगढी लगिएको थियो, जहाँ उनको निधन भएको पुष्टि भएको हो।
धनगढी उपमहानगरपालिका–५ हसनपुर निवासी ५८ वर्षीय चौधरी लामो समयदेखि डायलिसिस गराउँदै आएका थिए। उनका छोरा नवीन चौधरीका अनुसार उनी मधुमेह (सुगर) रोगबाट पनि पीडित थिए।
उनको निधनप्रति गोदावरी नगरपालिकाले गहिरो दुःख व्यक्त गरेको छ। प्रमुख प्रशासकीय अधिकृत धर्मराज विनाडीले जारी गरेको सूचनामा दिवंगत आत्माको चिर शान्तिको कामना गर्दै भावपूर्ण श्रद्धाञ्जली अर्पण गरिएको उल्लेख छ।
चौधरीको योगदानको सम्मानस्वरूप सोमबार गोदावरी नगरपालिका कार्यालयसहित अन्तर्गतका वडा कार्यालय तथा स्वास्थ्य संस्थाहरूमा शोक बिदा दिइएको जनाइएको छ।
