नेपालले टि ट्वान्टी महिला विश्व कपको ग्लोबल छनोट आयोजना गर्ने
काठमाण्डौः नेपालले टि ट्वान्टी महिला विश्व कपको ग्लोबल छनोट आयोजना गर्ने भएको छ।
अन्तराष्ट्रिय क्रिकेट परिषद (आइसिसी) ले बिहिवार विश्वकपको ग्लोबल छनोट २०२६ को जनवरी १२ देखि फेब्रुअरी २ सम्म नेपालमा आयोजना हुने बताएको छ। ग्लोबल छनोटमा नेपालसहित १० टोलीको सहभागिता रहने छ।
सहभागी टोलीलाई दुई समूहमा विभाजन गरिनेछ। समूहका शीर्ष ३ टोली सुपर सिक्स चरणमा पुग्नेछन्। सुपर सिक्सको शीर्ष ४ मा रहने टोलीले विश्वकपमा स्थान बनाउँनेछ।
प्रतियोगिताको खेल तालिका भने केही समयमै घोषणा गरिने आइसिसीले बताएको छ। बंगलादेश र आयरल्याण्डले २०२४ मा आइसिसी महिला विश्वकपमा सहभागिता जनाएका कारण छनोटमा स्वतः स्थान बनाएका छन्।
एसिया छनोटबाट थाइल्याण्ड र नेपाल, अमेरिका क्षेत्रिय छनोटबाट अमेरिकाले ग्लोबल छनोटमा स्थान बनाएका थिए। बाँकी ५ स्थानहरूमा अफ्रिका र युरोपबाट समान २ र पूर्वी एसिया–प्रशान्त क्षेत्र छनोटबाट १ टोलीले स्थान बनाउँने छन्।
नेपालले एसियाली छनोटको दोस्रो स्थानमा रहँदै पहिलो पटक ग्लोबल छनोटमा स्थान बनाएको थियो। यसैबीच, इङ्गल्याण्ड र वेल्समा हुने आइसिसी महिला टि ट्वान्टी विश्वकप २०२६ को तालिका पहिले नै जारी भइसकेको छ।
विश्व कप २०२६ को जुन १२ देखि जुलाई ५ सम्म चल्नेछ। २४ दिनमा ३३ खेल ओल्ड ट्राफर्ड, हेडिंगले, ह्याम्पशायर बाउल र ब्रिस्टल काउन्टी ग्राउन्ड सहित ७ वटा मैदानमा हुनेछ।
नेपाली महिला क्रिकेट टिममा सुदूपश्चिमबाट कबिता कुँवर, रितु कनौजिया, रेवती धामी, बिन्दु रावल लगायतका उदयीमान खेलाडीहरुले प्रतिनिधित्व गर्दछन्।
