महिला विश्वकपमा भारतको लगातार दोस्रो जीत

आईसीसी महिला टी–२० विश्वकपमा भारतले आफ्नो दोस्रो लगातार जीत दर्ता गरेको छ। बुधवार, दुवईमा भएको खेलमा भारतले श्रीलंकालाई ८२ रनको फराकिलो अन्तरले पराजित गर्दै शानदार प्रदर्शन गर्यो।

टस जितेर पहिले ब्याटिङ गर्ने निर्णय गरेको भारतले निर्धारित २० ओभरमा ३ विकेट गुमाएर १७२ रन बनायो। भारतको ब्याटिङ निकै सशक्त रह्यो, जहाँ पहिलो विकेटका लागि ९८ रनको साझेदारी भयो। कप्तान हरमनप्रित कौरले २७ बलमा ५२ रन बनाउँदै नटआउट रहिन्, जसमा १ छक्का र ८ चौका सामेल थिए।

अर्की प्रमुख खेलाडी स्मृति मन्धनाले ३८ बलमा ५० रनको योगदान दिँदा रनआउट भइन्। ओपनर शेफाली वर्माले पनि ४० बलमा ४३ रन बनाए। श्रीलंकाका बलरहरूले संघर्ष गरे, जहाँ चमारी आटापट्टु र अमा कन्चनले एक–एक विकेट लिए। १७३ रनको लक्ष्यसहित मैदानमा उत्रिएको श्रीलंका सुरुवातदेखि नै दबाबमा देखियो।

विकेटहरू लगातार गुमाउँदै श्रीलंकाले ९० रन मात्र बनाउन सक्यो। कभिसा दिलहरिले २२ बलमा २१ रन र अनुष्का सन्जीवनीले २२ बलमा २० रनको योगदान दिए। भारतका लागि अरुणधती रेड्डी र आशा सोभनाले उत्कृष्ट प्रदर्शन गर्दै तीन–तीन विकेट लिए भने रेणुका सिंहले दुई विकेट हात पारिन्। यस जितसँगै भारत समूह ’ए’ को दोस्रो स्थानमा उक्लिएको छ। अब भारतले समूह चरणको अन्तिम खेल अष्ट्रेलियासँग खेल्नेछ, जो लगातार दुई जीतपछि समूहको शीर्ष स्थानमा छ।