नित्य कर्म

डिलबहादुर महरा: बिहानै   उठी   ध्यानले  हात  हेरी ।
जपौँ कृष्णको रामको मन्त्र फेरि ।।
सधैँ नित्य सम्झौँ पितासाथ माता ।
सलामी चढाऔँ अझै ज्ञान दाता ।।
                   ।१।
तुरुन्तै  झुकौँ  माथले भूमि ढोगी ।
दुई  हात  छोएर  रत्ती   नरोकी ।।
गरौँ  शुद्धि  सम्पूर्ण  धोएर   अङ्ग ।
सिकौँ योग व्यायाम होला उमङ्ग ।।
                   ।२।
चढाएर  श्री सूर्ययमा  पुष्प पानी ।
पुकारौँ  सबै  देव  तेत्तीस जानी ।।
बुझी  पूर्ण  कर्तव्य  छोएर छाती ।
हटाऔँ कुरा तुच्छ बानी नजाती ।।
                    ।३।
लिई चित्तमा  देवता  जप्न थालौँ ।
बिनाकामका हीनताबोध फालौँ ।।
सबै सम्झिँदै प्राण सारा समान ।
क्षमानिम्ति तैयार होऔँ अजान ।।
                   ।४।
गरी बन्द  आँखा पुगौँ जन्म धर्ती ।
पढौँ आत्मभित्रै सुसंस्कार अर्ती ।।
गरेँ  कर्म  के के कुरा प्रष्ट सोचौँ ।
नयाँ जोसिला मुक्तिका मार्ग रोजौँ ।।
                   ।५।
तुरुन्तै नयाँ   जीवनी   पढ्नुपर्छ ।
सही कल्पना टाकुरा चढ्नुपर्छ ।।
बुझी  कर्म  दैनन्दिनी   टिप्नुपर्छ ।
नथाकी खुबै  साधना  गर्नुपर्छ ।।