बैतडीमा एसएसपीको नेतृत्वमा छुट्टै टोली परिचालन, सीआईबीका डीएसपी पनि खटिए
धनगढीः बैतडीमा युवती मृत भेटिएको घटनाको अनुसन्धानका लागि एसएसपीको नेतृत्वमा छुट्टै प्रहरी टोली परिचालन गरिएको छ।
सुदूरपश्चिम प्रदेश प्रहरी कार्यालयमा कार्यरत प्रहरी वरिष्ठ उपरीक्षक जनकराज पाण्डेको नेतृत्वमा घटनाको अनुसन्धानका लागि छुट्टै प्रहरी टोली परिचालन गरिएको हो।
सुदूरपश्चिम प्रदेश प्रहरीका प्रवक्ता प्रहरी वरिष्ठ उपरीक्षक मुकेशकुमार सिंहले एसएसपीको नेतृत्वमा अनुसन्धानमा सघाउन छुट्टै प्राविधिक टोली परिचालन गरिएको दिनेशखबरलाई बताए।
उनका अनुसार टोलीमा नेपाल प्रहरीको केन्द्रीय अनुसन्धान ब्युरो सिआईबीका प्रहरी नायब उपरीक्षक (डिएसपी) लाई खटाइएको छ। तर सो टोलीको नेतृत्व भने एसएसपी पाण्डेले नै गरेका छन्।
जिल्लाले गरिरहेको अनुसन्धानमा प्राविधिक सहयोग गर्न छुट्टै टोली खटाइएको प्रहरीले जनाएको छ।
बुधबारदेखि सम्पर्कविहीन भएकी दोगडाकेदार गाउँपालिका–७ की १७ वर्षीया भागरथी भट्ट बिहीबार मृत अवस्थामा फेला परेकी थिइन्।
उनको बलात्कारपछि हत्या गरेको आशंकामा प्रहरीले अनुसन्धान गरिरहेको छ। अनुसन्धानका लागि धनगढीबाट तालिम प्राप्त कुकुर समेत लगिएको छ।
