डडेल्धुराको एक होटलमा युवती मृत फेला
धनगढी: डडेल्धुरामा एक युवती मृत अवस्थामा फेला परेकी छन्। जिल्लाको अमरगढी नगरपालिका –७ की अन्दाजी २०/२१ वर्षीया निर्मला बोहोरा मृत अवस्थामा फेला परेकी हुन्।
बुधबार विहान अमरगढी –७ मा रहेको रातो गुराँस रिसोर्टमा बोहोरा मृत अवस्था फेला परेको जिल्ला प्रहरी कार्यालय डडेल्धुराले जनाएको छ। 'कोठाको बाथरुममा उनी(बोहरा) मृत अवस्थामा फेला परेपछि होटलले हामीलाई जानकारी गराएको थियो' डडेल्धुराका प्रहरी नायव उपरीक्षक दधिराम न्यौपानेले भने।
प्रहरी नायव उपरीक्षक न्यौपानेका अनुसार घटनास्थलमा अहिले प्रहरी पुगेको छ भने आफन्त आउँदैछन्। उनी विवाहित वा अविवाहित हुन भन्ने नखुलेको डिएसपी न्यौपानेले बताए।
प्रारम्भिक रूपमा बुझ्दा युवती आएर आफै कोठा बुक गरेको भन्नेसम्म खुलेको प्रहरीले जनाएको छ। बोहोरोको हत्या वा आत्महत्या हो भन्नेबारे अनुसन्धान जारी रहेको प्रहरीले जनाएको छ।
