आफन्तलाई नियुक्ति नदिलाउन सांसदलाई रवि लामिछानेको निर्देशन

काठमाडौँः रवि लामिछाने ले आफ्ना पार्टीका सांसदहरूलाई आफन्त र साथीभाइलाई नियुक्ति दिलाउने प्रयास नगर्न स्पष्ट निर्देशन दिएका छन्। सिंहदरबारस्थित संसदीय दलको कार्यालयमा बसेको बैठकमा बोल्दै उनले यस्तो बताएका हुन्।

बैठकमा लामिछानेले आफूहरू युवापुस्ताको बलिदान र समर्थनबाट यो स्थानमा पुगेको स्मरण गराउँदै जिम्मेवारीपूर्वक काम गर्न सांसदहरूलाई आग्रह गरे। 'जेन्जी भाइबहिनीको बलिदानले यहाँ आइपुगेका छौँ,' उनले भनेका थिए।

बैठकमा संसदीय दलका नेता तथा प्रधानमन्त्री बालेन्द्र शाह पनि सहभागी थिए, तर उनले कुनै धारणा व्यक्त गरेनन्।

यसैबीच, बैठकले उपसभामुख पदका लागि रूबी ठाकुर को पक्षमा मतदान गर्ने निर्णय गरेको छ। ठाकुरले रास्वपाको समर्थनमा उम्मेदवारी दर्ता गराएकी हुन्। उपसभामुखको निर्वाचन आज हुने तय भएको छ।