त्रिशूली बस दुर्घटना (अपडेट) : मृत्यु हुनेको संख्या ५ पुग्यो, २० भन्दा बढी बेपत्ता

त्रिशूली नदीमा बस दुर्घटनामापरि मृत्यु हुनेको संख्या ५ पुगेको छ। शुक्रबार बिहान धादिङको बेनिघाट रोराङ गाउँपालिका वडा नम्बर ३ सलाङघाटमा रहेको त्रिशूली नदीमा बस दुर्घटनामा भएको हो। मोडमा पुगेपछि घुमाउन खोज्दा बस झण्डै एक सय मिटर तल त्रिशूली नदीमा खसेको थियो। सर्लाहीका ३५ वर्षीय अजय दास, २५ वर्षीय विजय कुर्मी र नाम र ठेगाना नखुलेको एक जना पुरुषको घटनास्थलमै ज्यान गएको जिल्ला प्रहरी कार्यालयका प्रमुख प्रहरी उपरीक्षक राजकुमाव वैदवारले बताए। यस्तै नदीले बगाएर ल्याउँदै गरेको अवस्थामा मुग्लिन नजिकैबाट २ जनाको शव प्राप्त भएको प्रहरीले जनाएको छ।

दुर्घटनामा घाइते भएका अन्य १६ जनाको उपचार भैरहेको छ। घाइतेहरुको राजमार्ग सामुदायिक अस्पताल मलेखु, प्राथमिक स्वास्थ्य केन्द्र गजुरी, राजमार्ग सामुदायिक अस्पताल गजुरी, र ट्रमा सेन्टर काठमाण्डौमा उपचार भैरहेको छ।

यस्तै घाईते मध्ये ७ जनाको उपचारपछि डिस्चार्ज भइसकेकोछ। सर्लाहीको गमहरिया नगरपालिका–८ का ३६ वर्षीय दिनेश ठाकुर, हरिपुर नगरपालिका–७ का ३४ वर्षीय भोगेन्द्र चौधरी, औरही गाउँपालिका–७ का १५ वर्षीय राहुल महत्तो मध्यम, हरिपुर नगरपालिका–९ का अमृत लामा, कबिलासी लाठी गाउँपालिका–६ का ३१ वर्षीय भुपेन्द्र कुमार यादव, कबिलासी गाउँपालिका–४ का ३३ वर्षीय राय यादव र भारतको बिहार सितामणि, पनौलीथाना–४ का ४२ वर्षीय भिरेन्द्र ठाकुर गजुरी अस्पताल धादिङमा उपचारपछि डिस्चार्ज भइसकेका छन्।

यस्तै घाइते भारत सितामणिका ४० वर्षीय धिरेन्द्र ठाकुर, सर्लाहीको कबिलास गाउँपालिका–४ का ३२ वर्षीय बिजय यादव, हरिपुर गाउँपालकिा–४ का २८ वर्षीय प्रमोद कुँवर, सहचालक, मलंगवा नगरपालिका–११ का १६ वर्षीय सिकिन्द्र कुमार महतो, विष्णु गाउँपालिका–५ का २१ वर्षीय कुश रन्जम महतो, ब्रहमपुरीकी १६ वर्षीया स्वेता रौनियार, हरिहरपुर नगरपालिकाका ४० वर्षीय बस चालक जीवन बिक, ब्रहमपुरी–६ का राकेश बैठा र अन्य नाम नखुलेका दुई जनाको काठमाण्डौ ट्रमा सेन्टरमा उपचार भैरहेको प्रहरीले जनाएको छ।

ना ६ ख ७४६९ नम्बरको याात्रुवाहक बस शुक्रबार बिहान ३ बजे नदीमा खसेपछि केही व्यक्तिले पौडेर ज्यान जोगाएका थिए। राति पौडेर ज्यान जोगाए पनि उनीहरुको बिहान ७ बजेमात्र दुई जनाको नदी किनारको खोचबाट उद्धार गरिएको थियो। उनीहरुको अवस्था सामान्य रहेको छ। बसमा मलंगवाबाट ३९ जना यात्रु र हरिपुरबाट दुई जना यात्रु चढेको यातायात समितिले जनाएको छ। त्यही बसमा सवार ‘बी’ १६ नम्बर सिटका यात्रु समिमराज अन्सारीका अनुसार सबै सिट भरिएर चार जना मानिस मुढामा बसेको र सवारी चालक दलका सदस्यबाहेक क्याबिनमा अन्य चार जना रहेका थिए। 

यात्रुहरु सबैको टिकट नभएको बताइएको छ । यातायात समितिले ३८ जनाको चलानी गरी पठाइएको स्पष्ट पारेको छ। दुर्घटनामा परेका यात्रुहरुको नेपाल प्रहरी, नेपाली सेना, सशस्त्र प्रहरी र रेडक्रसका स्वयंसेवकले उद्धार गरेका थिए। प्रहरीले भने चालक निदाएर दुर्घटना भएको प्रारम्भिक अनुमान गरेको छ।