आज सम्पन्न हुँदै ‘मेरो भ्वाइस युनिर्भस र मेरो डान्स युनिर्भस’
काठमाडौँः नेपालको सबैभन्दा ठूलो धनराशि रु एक करोड पुरस्कार राखिएको दुई ‘रियालिटी शो’ को दोस्रो संस्करण ‘मेरो भ्वाइस युनिर्भस र मेरो डान्स युनिर्भस’ को ‘ग्रयाण्ड फिनाले’ अर्थात् अन्तिम प्रतिस्पर्धा आज सम्पन्न हुँदैछ।
आयोजक इन्ट्रा नेशनल वेलफेयर एण्ड सर्पोट फाउन्डेशन अफ अमेरिका अनुसार आज ललितपुरको गोदावारीस्थित सन्राइज अन्तरराष्ट्रिय सम्मेलन केन्द्रमा सो प्रतियोगिता सम्पन्न हुने भएको हो। कार्यक्रममा मेरो ‘भ्वाइस युनिर्भस’तर्फ छनोट भएका उत्कृष्ट छ प्रतियोगिको र ‘डान्स’तर्फको उत्कृष्ट छ प्रतियोगी सहभागी हुनेछन्। बत्तीस सत्रसम्म प्रसारण भइसकेको ‘भ्वाइस’ को पाँच उत्कृष्टमा सिक्कमबाट दीपराज राई, दार्जिलिङबाट वाङेगे शेर्पा, कतारबाट जुनु प्रसाई, जापानबाट प्रथम गुरुङ, हङकङबाट टपराज तामाङ र नेपालको झापाबाट प्रशान्त पोखरेलबीच अन्तिम प्रतिस्पर्धा हुँदैछ।
त्यसैगरी मेरो ‘डान्स’ तर्फ सिक्किमबाट अमृता राई, हङ्कङबाट रिस्ता गुरुङ, नेपालबाट सुशना कोइराला, सीतु महर्जन, सुरज सिञ्जाली मगर र साजन पाख्रिनबीच अन्तिम प्रतिस्पर्धा हुनेछ। यी दुवै रियालिटी शोमा प्रमुख विजेताले रु एक करोड पाउने छन् भने उपविजेताले २५ लाख र तेस्रो हुनेले १० लाख पुरस्कार पाउनेछन्। चौथो, पाँचौँ र छैटौँले क्रमशः छ लाख पाँच लाख र चार लाख पाउनेछन् भने टप १० तीन लाख पाइसकेका छन् ।
तीन महिनासम्म चलेको प्रतियोगितामा संसारभर छरिएर रहेका नेपाली र नेपालभाषीको सहभागिता रहेको छ। “यो ‘रियालिटी सो’ को मुख्य उद्देश्य विश्वभर रहेका नेपालीहरूलाई सांस्कृतिक माध्यमबाट जोड्नु हो”, इन्ट्रा नेपाल वेलफेयर फाउन्डेशनका अध्यक्ष डिल्ली अधिकारीले भन्नुभयो।
