रेशमलाई पक्राउ गर्न पत्र काट्ने विष्टलाई धरौटीमा छाड्न आदेश

काठमाडौं :  सर्वोच्च अदालतका शाखा अधिकृत महिमानसिंह विष्टलाई धरौटीमा छोड्न जिल्ला अदालत काठमाडौँले आदेश जारी गरेको छ।

न्यायाधीश दिनबन्धु बरालको इजलासले उनलाई धरौटीमा छाड्न आदेश दिएको हो।

नागरिक उन्मुक्ति पार्टीका संरक्षक रेशम चौधरीलाई पक्राउ गर्न ’अनधिकृत’ पत्र लेखेपछि उनी पक्राउ परेका थिए। सोही पत्रका आधारमा प्रहरीले चौधरीलाई नेपाल प्रज्ञा प्रतिष्ठानबाट नियन्त्रणमा लिएको थियो। सीके राउत नेतृत्वको जनमत पार्टीसँग एकता घोषणा हुनै लाग्दा चौधरीलाई कार्यक्रमस्थल प्रज्ञा भवनबाट पक्राउ गरिएको थियो।

विष्टले कर्तव्य ज्यान,ज्यान मार्ने उद्योग र डाँका चोरी मुद्दामा चौधरीलाई नियन्त्रणमा लिएर कैदमा राख्नु भनी पत्र लेखेका थिए। उनले टीकापुर घटनामा ज्यान गुमाएका मान्छेहरूको आत्माले पोलेपछि पत्र लेखेको प्रहरीसमक्ष बयान दिएका छन्।