नयाँ सेटअप र नामसहित आउँदैछ ‘कमेडी नाइट विद च्याम्पियन’
काठमाडौंः ‘कमेडी क्लब विथ च्याम्पियन’ को सफलतापछि निर्देशक विशाल भण्डारीसहितको समुहले नयाँ टेलिभिजन कमेडी शो ‘कमेडी नाइट विथ च्याम्पियन’ दर्शकमाझ ल्याउने भएको छ।
सोमवार काठमाडौंमा आयोजित पत्रकार सम्मेलनमा कार्यक्रमका प्रस्तुतकर्ता थ्री प्रोडक्सनले कार्यक्रमको शीर्षकमा ‘क्लब’ को साटो ‘नाइट’ शब्द प्रयोग गरिएको जनाएको छ। कार्यक्रमको निर्मातामा निर्देशक भण्डारीसहित सगुन पाण्डे तथा हिरण बस्नेत रहेका छन्।
निर्देशक भण्डारीका अनुसार कार्यक्रमको शीर्षकमात्र होइन सेटअप तथा संरचनामा पनि परिवर्तन गरिएको छ। पत्रकार सम्मेलनमा कार्यक्रममा सहभागिता जनाएर दर्शकलाई हँसाउने महत्वपूर्ण जिम्मेवारी पाएका कलाकारको नामसमेत घोषणा गरिएको छ।
अब यो कार्यक्रममा प्रभात लामा, भरतमणि पौडेल, कैलाश कार्की, सन्तोष थापा, पवन भट्टराई, सजन श्रेष्ठ, सुमन कार्की, मेक्सम गौडेल तथा सुमन कोइरालाले दर्शकलाई हँसाउने छन्। कार्यक्रमको अध्यक्षको रुपमा अभिनेत्री तथा निर्देशक दीपाश्री निरौला नै रहने छिन्।
हिमालय टेलिभिजन तथा ओएसआर रियालिटी यूट्युब च्यानलबाट प्रसारण हुने यो कार्यक्रमको प्रसारण मिति भने घोषणा गरिएको छैन। निर्देशक भण्डारीका अनुसार केही दिनमै कार्यक्रमको प्रसारण मिति घोषणा गरिने छ भने कार्यक्रम पनि चाँडै नै दर्शकमाझ आउने छ। पत्रकार सम्मेलनमा कार्यक्रमको ट्रेलर सार्वजनिक गरिएको थियो।
