धनगढीको भोकेस्नल स्कुलबाट ८९ ले तालिम लिएकामा ४१ जना रोजगार

धनगढीः धनगढी उपमहानगरपालिकाले नेपाल यूथ फाउन्डेसनसँगको सहकार्यमा चलाइएको भोकेस्नल स्कुलबाट यो वर्ष चारवटा तालिम सम्पन्न भएका छन्।

धनगढी–१८ मा रहेको भोकेस्नल स्कुलबाट यो वर्ष चार विधामा ८९ जनाले तालिम लिएका हुन्। नेपाल यूथ फाउन्डेसनको सहकार्यमा २०८० असोज ६ गते खुलेको धनगढी भोकेस्नल स्कुलमा यो वर्ष चार वटा तालिम सम्पन्न भएका छन्। पहिलो चरणमा प्लम्बिङ्ग र इलेक्टिकल तालिम भएको थियो। पहिलो चरणमा असोजदेखि भएको तालिममा ५२ जना सहभागी मध्ये २७ जनाले प्लम्बिङ्ग र २५ जनाले इलेक्ट्रिकल तालिम लिएका हुन्।

दोस्रो चरणमा भएको वेल्डिङ सहायक र फर्निचर मेकरको तालिममा ३७ जना सहभागी भएकोमा शुक्रवार तालिम समापन भएको छ। दोस्रो चरणमा वेल्डिङ सहायकको ५५० घण्टे तालिममा २१ तथा ३९० घण्टे फर्निचर मेकर तालिममा १६ जनाले तालिम लिएका छन्। तालिम समापनपछि उपप्रमुख कन्दकलाकुमारी रानाले युवाहरूलाई प्रमाणपत्र वितरण गरेकी हुन्।

उनले उपमहानगरपालिकाको नीति तथा कार्यक्रमअनुसार रोजगार तथा स्वरोजगार हुन् सहयोग गर्न युवाहरूलाई विभिन्न तालिम दिन भोकेस्नल स्कुल खोलेको बताइन्। तालिमपछि युवाहरू आयआर्जन गर्न सक्षम हुने र आर्थिक रुपले आत्मनिर्भर हुने विश्वास व्यक्त गरिन।

कार्यक्रममा वडा नम्बर १८ का अध्यक्ष भुवन रिजाल र निमित्त प्रमुख प्रशासकीय अधिकृत नरेन्द्रबहादुर खातीको समेत उपस्थिति रहेको थियो। तालिम लिएकामध्ये ४१ जनाले पाए रोजगारी पहिलो चरणमा तालिम लिएका ५२ जनामध्ये ३३ जनाले ओजिटीकै क्रममा रोजगारी पाएका छन्। 

पहिलो चरणमा तालिम लिएका ३३ र अहिले दोस्रो चरणमा तालिम लिएका थप ८ जनासहित ४१ जनाले तालिमपछि रोजगारी पाएको धनगढी उपमहानगरपालिकाका रोजगार संयोजक चन्द्र महराले बताए। ‘युवाहरूलाई लक्षित गरेर चलाइएको तालिममा अहिलेसम्म ८९ जनाले तालिम लिएका छन्,’ उनले भने, ‘जसमध्ये ४१ जनाले ओजिटीकै क्रममा रोजगारी पाएका छन् भने केहीले आफैँ काम गर्न थालेका छन्।’

धनगढी उपमहानगरपालिकाले नेपाल यूथ फाउन्डेसनसँग चालु आर्थिक वर्षमा चारवटा तालिम सञ्चालन गर्ने सम्झौता गरेको थियो। धनगढीसहित अन्य पालिकाका बेरोजगार युवाहरूलाई तालिम दिन खोलिएको भोकेस्नल स्कुलमा चारवटा तालिम दिन ५२ लाख खर्च भएको रोजगार संयोजक महराले बताए। जसमध्ये २७ लाख यूथ फाउन्डेसन र १५ लाख धनगढी उपमहानगरपालिकाले व्यवस्थापन गरेको हो। तालिम लिनेमध्ये फूलबारी क्षेत्रभन्दा बाहिरका युवाहरूलाई यातायात खर्च बापत मासिक २ हजार दिइएको महराले बताए।