फागुन ३ बाट कमेडी च्याम्पियनको तेस्रो सिजन
काठमाडौँः कमेडी च्याम्पियन सिजन–३ आगामी फागुन ३ गतेबाट सुरु हुने भएको छ।
निर्माण पक्षले बुधवार पत्रकार सम्मेलन गरी प्रतियोगितमा सोचेभन्दा बढी प्रतिभावान् प्रतिस्पर्धी आएकाले शोको फर्म्याटमा हेरफेर गरिने जानकारी दिएको हो। निर्देशक विशाल भण्डारीका अनुसार यो शो जम्मा ३३ एपिसोडको रहनेछ। त्यसमा ३२ नियमित र एक एपिसोड फाइनल रहनेछ।
फिजिकल अडिसनको पाँचमध्ये तीन एपिसोड तयार भइसकेको उनले बताए। फर्म्याट परिवर्तनबारे जानकारी दिँदै भण्डारीले भने, ‘दुई सिजनमा हामी टप २४ भनेर गर्थ्यौँ। यो पटक हामीले टप ३० को फर्म्याटमा लैजाँदै छौं। पहिला सुपर १५ थियो अहिले सुपर १६ को फर्म्याटमा जान्छौं। त्यसपछि टप १०, ९, ८ हुँदै जान्छ। वाइल्ड कार्डको पनि अवसर छ।’
प्रतिस्पर्धा रोचक बनाउन फर्म्याट परिवर्तन गरेको निर्णाण पक्षले जनाएको छ। जजमा भने पहिलाकै चार जना, सन्तोष पन्त, मनोज गजुरेल, प्रदीप भट्टराई र ऋचा शर्मा दोहोरिने छन्। निर्माण पक्षका अनुसार विजेताले २५ लाख नगद र सोही मूल्य बराबरको गाडी पुरस्कार पाउनेछन्।
