संकल्प पूरा गर्न सबै पक्षको सहमति र सहकार्य आवश्यक छ : प्रचण्ड
पूर्व प्रधानमन्त्री एवम् नेपाल कम्युनिष्ट पार्टी (नेकपा) का अध्यक्ष पुष्पकमल दाहाल प्रचण्डले समृद्धिको संकल्प पूरा गर्न सबै पक्षको सहमति र सहकार्य आवश्यक रहेको बताएका छन्।
तीन नम्बर प्रदेश सरकारले शुक्रबार चितवनमा आयोजना गरेको निजी क्षेत्रसँग अन्तरक्रिया कार्यक्रमलाई सम्बोधन गर्दै दाहालले सबै पक्षको सहमति र सहकार्यबाट देशको समृद्धि र विकास सम्भव हुने बताए।
आयातमुखी अर्थतन्त्रलाई विस्थापित गर्नुको विकल्प नरहेको बताउदै उनले निजी क्षेत्रलाई उद्योगधन्दा र उत्पादनमा लगानी गर्न आह्वान गरे।
उनले सरकार र प्रतिपक्षीको सपना पनि समृद्धि नै रहेकोले यसलाई साकार बनाउन सहमति र सहकार्य गरी कार्यान्वयन गर्नुपर्ने बताए। निजी क्षेत्रसँग सहकार्य गर्न सबै पक्ष इमान्दार हुनुपर्ने बताउँदै उनले सार्वजनिक र निजी क्षेत्र इमान्दारिता साथ मिलेर विकास निर्माणमा लाग्नुपर्ने बताए।
२००७ साल, २०१७ साल, २०४६ को जस्तो परिवर्तन अहिलेको नभएको बताउँदै उनले अहिलेको परिवर्तन मात्रात्मक नभइ गुणात्मक परिवर्तन भएको बताए।
