कैलालीको स्याउले बजारमा एक करोड लगानीमा साथी मार्टको शाखा

धनगढीः कैलालीको गोदावरी नगरपालिका वडा नम्बर ८ स्याउले बजारमा साथी मार्टको शाखा सञ्चालनमा आएको छ। बिक्की ओझा र सोभी रानाको झण्डै एक करोडको लागतमा मार्टको शाखा सञ्चालनमा आएको हो। मार्टको शनिबार एक कार्यक्रमकाबीच उद्घाटन गरिएको छ। 

सञ्चालक ओझाका अनुसार स्याउले बजार क्षेत्रमा दैनिक खाद्य सामग्री खरिदका लागि समस्या हुँदै आएकाले मार्ट सञ्चालन गरिएको हो। स्याउले बजार क्षेत्रका नागरिकले आवश्यक सामग्री खरिदका लागि अत्तरिया र धनगढी आउनुपर्ने बाध्यताको अन्त्य भएको उनले बताए। 

ओझाका अनुसार मार्टमा दैनिक उपभोग्य सामग्री, श्रृंगारका सामग्री, खेलौना, लुगाकपडा लगायत स्थानीय स्तरमा उत्पादित  खाद्य सामग्री पाइने छन्। यस्तै साथी मार्टका सिइओ सरोज पोखरेलले यसै आर्थिक वर्षमा देशभर ३०० शाखा सञ्चालनमा ल्याउने तयारी भएको बताए।