दार्चुलाको शैल्यशिखरका ४ सय २५ जनालाई रोजगारी
धनगढी : दार्चुलाको शैल्यशिखर नगरपालिकाका ४ सय २५ जनाले रोजगारी पाएका छन् ।
प्रधानमन्त्री रोजगार कार्यक्रम अन्तर्गत नगरपालिकाका ४ सय २५ जनाले रोजगारी पाएका हुन् । रोजगारी पाउनेमा २ सय २८ जना महिला र १ सय ९७ जना पुरुष रहेका छन् । उनीहरुले १ सय दिने रोजगारी पाएका हुन् ।
छनौटमा परेकाहरुलाई एकदिने अभिमुखीकरण तालिम दिई गत पुस २६ गतेदेखि नगरपालिका भित्रका २९ योजना निर्माणमा लगाइएको नगरपालिकाले जनाएको छ ।
नौ वटा वडा रहेको सो नगरपालिकाका वडाहरुले छनौट गरी पठाएका आर्थिक अवस्था कमजोर भएकाहरुलाई रोजगारीमा समावेश गरिएको र उनीहरुले दैनिक ५ सय १७ रुपैयाँका दरले पारिश्रमिक पाउने बताइएको छ ।
नगरपालिकामा यो वर्ष प्रधानमन्त्री रोजगार कार्यक्रमका लागि झण्डै २ करोड १९ लाख बजेट विनियोजन गरिएको नगरपालिकाले जनाएको छ ।
तीन वर्षअघि सञ्चालनमा आएको प्रधानमन्त्री रोजगार कार्यक्रम अन्तर्गत पहिलो वर्ष १ सय ९८ जनाले रोजगारी पाएका थिए भने गत वर्ष दुई सय जनाले रोजगारी पाएका थिए ।
