धनगढीमा तरकारीको मूल्य बढ्दा उपभोक्ता मारमा

धनगढी: धनगढीमा पछिल्लो समय तरकारीको मूल्य निरन्तर बढेपछि उपभोक्ता मारमा परेका छन्। बजारमा पर्याप्त मात्रामा तरकारी भित्रिए पनि मूल्यमा अपेक्षित गिरावट नआउँदा दैनिक उपभोग्य तरकारी खरिद गर्न उपभोक्तालाई थप आर्थिक भार परेको छ।

वर्षायाम कायमै रहँदा तराईका समथल क्षेत्रमा लामो समय पानी जम्ने र खेतबारीमा लगाइएका तरकारीका बोटमा क्षति पुग्ने भएकाले स्थानीय उत्पादन प्रभावित भएको व्यवसायीहरू बताउँछन्। गर्मीयाम सुरु भएसँगै तरकारीको मूल्य बढ्न थालेको र पछिल्लो समय वर्षाका कारण आपूर्तिमा समेत असर परेको उनीहरूको भनाइ छ।

धनगढीमा पछिल्ला वर्षको तुलनामा यस वर्ष केही तरकारीको मूल्य अस्वाभाविक रूपमा बढेको उपभोक्ताहरूको गुनासो छ। बजारमा तरकारीको आपूर्ति भइरहे पनि मूल्य घट्न नसक्दा उपभोक्ताले महँगो मूल्य तिर्न बाध्य भएका छन्।

व्यवसायीका अनुसार धनगढीमा खपत हुने अधिकांश तरकारी पहाडी जिल्ला तथा पूर्वी नेपालका विभिन्न जिल्लाबाट ल्याउनुपर्ने अवस्था छ। लामो दूरीबाट तरकारी ढुवानी गर्दा यातायात खर्च बढ्नुका साथै बीचका तहमा हुने कारोबारले समेत उपभोक्तासम्म पुग्दा मूल्य बढ्ने गरेको उनीहरू बताउँछन्।

भारतबाट अहिले मुख्यगरी आलु र प्याज मात्रै आयात भइरहेको छ। अन्य तरकारीको आयात कम वा नहुँदा बाहिरी जिल्लाबाट आउने तरकारीमै निर्भर हुनुपरेको व्यवसायीको भनाइ छ। यसले बजारमा आपूर्ति व्यवस्थापनसँगै मूल्यमा समेत प्रभाव पारेको छ।

व्यवसायीहरूका अनुसार अहिले धनगढीको बजारमा केही तरकारीको मूल्य प्रतिकिलो १ सय २० रुपैयाँसम्म पुगेको छ। कतिपय तरकारीको मूल्य १ सय रुपैयाँभन्दा माथि पुगेको छ भने केहीको मूल्यमा दैनिकजसो उतारचढाव भइरहेको छ।

यता, किसानले उत्पादन गरेको तरकारी तुलनात्मक रूपमा सस्तो दरमा बिक्री गरे पनि उपभोक्तासम्म पुग्दा मूल्य निकै बढ्ने गरेको गुनासो छ। किसान र उपभोक्ताबीच विभिन्न तहका बिचौलिया रहने भएकाले मूल्यवृद्धिको मुख्य कारणमध्ये यो पनि एक भएको व्यवसायी तथा उपभोक्ताको भनाइ छ।

उत्पादनस्थलमा किसानले कम मूल्य पाउने तर धनगढीको बजारमा आइपुग्दा त्यही तरकारी महँगो हुने अवस्थाले किसान र उपभोक्ता दुवै प्रभावित भएका छन्। तरकारीको मूल्य नियन्त्रण तथा किसानबाट उपभोक्तासम्मको आपूर्ति प्रणाली व्यवस्थित गर्न सम्बन्धित निकायले प्रभावकारी अनुगमन गर्नुपर्ने आवश्यकता देखिएको छ।