प्रतिनिधिसभाः समसामयिक विषयमा सरकारको ध्यानाकर्षण

काठमाडौँ : प्रतिनिधिसभाका सांसदहरुले मौलिक हक कार्यान्वयन, विपद् व्यवस्थापन र सीमावर्ती क्षेत्रका नागरिकका समस्या समाधानलगायत समसामयिक विषयमा सरकारको ध्यानाकर्षण गराएका छन् । 

सभाको आजको बैठकको विशेष समयमा रास्वपा सांसद प्रभा कार्कीले उद्योग, होटल तथा कर्पोरेट क्षेत्रका श्रमिकले सरकारले तोकेको न्यूनतम पारिश्रमिक नपाएको उल्लेख गर्र्दै नेपाली श्रम बजारलाई व्यवस्थित गर्नुपर्नेमा जोड दिए । 

नेपाली कांग्रेसका सांसद अभिशेषकप्रताप शाहले अमेरिकाको सानफ्रान्सिस्कोमा रहेको महावाणिज्य दूतावास बन्द गर्ने निर्णय फिर्ता लिन माग गरे । 

नेपाल कम्युनिष्ट पार्टी (एमाले) का सांसद गुरुप्रसाद बरालले संविधानप्रदत्त मौलिक हकको कार्यान्वयनमा गम्भीर बन्न सरकारलाई सुझाव दिए । 

नेपाली कम्युनिष्ट पार्टीका सांसद धनबहादुर बुढाले डोल्पा जगदुल्ला गाउँपालिका–५ गैरीगाउँमा बाढीपहिरोबाट प्रभावित नागरिकलाई तत्काल राहत दिन सरकारको ध्यानाकर्षण गराए। 

राष्ट्रिय प्रजातन्त्र पार्टीका सांसद खुश्बु ओलीले विद्युतीय सवारी साधनको आयातका क्रममा कर छली भएको आशङ्का बढ्दै गइरहेको उल्लेख गर्दै सो सम्बन्धमा छानबिन गरी राजस्व सङ्कलन गर्न सुझाव दिए। 

श्रम संस्कृति पार्टीका सांसद आरेन राईले सशस्त्र प्रहरी जवान र हबल्दारलाई १६ वर्षमा पेन्सन पाउने व्यवस्था गर्न माग गरे । 

रास्वपाका सांसद प्रमिला कुलुजुले वैदेशिक रोजगारीमा रहेका नागरिकलाई मताधिकार दिने व्यवस्था गर्न सरकारको ध्यानाकर्षण गरे। 

कांग्रेस सांसद कालीबहादुर सहकारीले कर्णाली क्षेत्रको समग्र विकासमा विशेष योजना बनाउन सुझाव दिए ।  रास्वपा सांसद करिष्मा कठरियाले सिकलसेल तथा अन्य अनुवांशिक रक्तविकारबाट प्रभावित बिरामीको संवैधानिक स्वास्थ्यको हक कार्यान्वन गर्न आग्रह गरे ।

 रास्वपा सांसद आनन्दबहादुर चन्दले खेती प्रणाली, माटो परीक्षण, मल बीउको उपयोगलगायत विषयमा किसानलाई तालिम दिनुपर्नेमा जोड दिए। 

सोही दलका जगदीश खरेल (दोलखा) ले जनप्रतिनिधिलाई नटेर्ने कर्मचारीलाई तत्काल कारबाही गर्न माग गर्नुभयो । सोही पार्टीका सांसद खगेन्द्र कर्णले सामुदायिक शिक्षामा लगानी अभिवृद्धि गर्न सुझाव दिनुभयो । 

रास्वपा सांसद बुद्धिप्रसाद पन्तले वीरगञ्जका तारे होटलमा सञ्चालित क्यासिनोमा प्रहरी र प्रशासनको मिलेमतोमा नेपाली नागरिकलाई पनि सहजै प्रवेश गराइएको भन्ने गुनासो छानबिन गर्न माग गरे। सोही दलका सांसद सृष्टी भट्टराईले राष्ट्रिय राजमार्गमा ढाट राखेर अवैध असुली गर्नेमाथि कारबाही गर्न माग गरे। 

सोही पार्टीका सांसद सिर्जना श्रेष्ठले धरानस्थित बिपी कोइराला स्वास्थ्य विज्ञान प्रतिष्ठानमा भएको भ्रष्टाचारसम्बन्धी फाइल तत्काल अनुसन्धान गर्न आग्रह गरे।  

 रास्वपा सांसद बोधनारायण श्रेष्ठले रासायनिक मल वितरणसम्बन्धी समस्या समाधान गर्न आग्रह गरे । सोही पार्टीका टेकबहादुर शाक्यले पर्साको ठोरी, जानकीटोला र भिष्वा छोटी भन्सार तत्काल सञ्चालनमा ल्याई सीमावर्ती क्षेत्रका नागरिकलाई भन्सार प्रशासनमा सहजीकरण गर्न सुझाव दिए। 

 सोही पार्टीका बदनकुमार भण्डारीले काभ्रेपलाञ्चोकको पाँचखालका अजित मिजार अन्तरजातीय विवाहका कारण २०७३ असार २९ गते मृत फेला परेको घटनाका बारेमा छानबिन गरी पीडित परिवारलाई राहत दिन माग गरे ।  सोही दलका सांसद सूर्यबहादुर तामाङले वर्तमान सरकारले १०० दिनमा जनअपेक्षा पूरा गर्न सफल भएको दाबी गरे ।