टेम्पो जानाजान भीरबाट नखसालिएको वन कार्यालयको दाबी
धनगढीः कैलालीको गोदावरी नगरपालिका–४ अन्तर्गत चुरे क्षेत्रभित्र अतिक्रमण हटाउने क्रममा टेम्पो भीरबाट खसेको घटनालाई लिएर फैलिएका आरोपप्रति डिभिजन वन कार्यालय कैलाली ले कडा आपत्ति जनाएको छ। कार्यालयले सामाजिक सञ्जालमा गरिएको प्रचार भ्रामक रहेको जनाउँदै घटनाको वास्तविक अवस्था सार्वजनिक गरेको हो।
कार्यालयद्वारा आयोजित पत्रकार सम्मेलनमा जारी विज्ञप्तिअनुसार उक्त स्थान चुरे क्षेत्रभित्र पर्ने अत्यन्त संवेदनशील वातावरणीय प्रणाली हो। वर्षौंदेखि सार्वजनिक वन क्षेत्रमा अवैध अतिक्रमण, टहरा तथा छाप्रा निर्माण र सरकारी वन जमिन कब्जा गर्ने क्रम बढेपछि वन प्रशासनले कानुनअनुसार नियमित रूपमा नियन्त्रण अभियान सञ्चालन गर्दै आएको जनाएको छ।
वन कार्यालयले पछिल्ला पाँच महिनामा सो क्षेत्रमा फेरि अवैध संरचना थपिएको र भाइरल बनाइएको टेम्पो कुनै चलायमान सवारी साधन नभई इन्जिनसहितका महत्वपूर्ण भाग हटाइएको पुरानो फलामे संरचना मात्र रहेको स्पष्ट पारेको छ। सो संरचना अतिक्रमण गरी बनाइएको टहराको पर्खालका रूपमा प्रयोग गरिएको दाबी विज्ञप्तिमा गरिएको छ।
कार्यालयका अनुसार करिब एक महिनाअघि नै उक्त संरचना हटाउन सम्बन्धित पक्षलाई निर्देशन दिइएको थियो। त्यसबेला अन्य टहरा हटाइए पनि टेम्पो प्रयोग गरिएको संरचना हटाउन अटेर गरेपछि वन कर्मचारीले त्यसलाई सडकतर्फ सारिदिएका थिए। तर पछि पुनः सोही स्थानमा ल्याएर राखी अतिक्रमणलाई निरन्तरता दिइएको भनाइ छ।
जेठ २९ गते पुनः अतिक्रमण हटाउने अभियानका क्रममा टेम्पोलाई पछाडि सार्ने क्रममा जमिनको बनावट असन्तुलित भएकाले नियन्त्रणबाहिर गई भीरबाट खसेको कार्यालयको दाबी छ। वन कर्मचारीले जानाजान भीरबाट धकेलेर खसालेको भन्ने आरोप निराधार रहेको पनि स्पष्ट पारिएको छ।
वन कार्यालयले चुरे संरक्षण, सार्वजनिक वनको सुरक्षा र अतिक्रमण नियन्त्रण कार्य कानुनसम्मत रूपमा भइरहेको जनाउँदै घटनालाई अतिरञ्जित नगर्न आग्रह गरेको छ। साथै, वन संरक्षणको अभियानलाई कमजोर पार्ने उद्देश्यले फैलाइने भ्रमपूर्ण सूचनाप्रति सचेत रहन सञ्चारमाध्यम र सर्वसाधारणलाई अनुरोध गरेको छ।
उक्त टेम्पो खसालिएको दृश्य सामाजिक सञ्जालमा व्यापक रूपमा भाइरल भएपछि वन कर्मचारी मात्र नभई सरकारकै आलोचना सुरु भएको थियो। यही पृष्ठभूमिमा जिल्ला वन कार्यालयले पत्रकार सम्मेलन गरी आफ्नो आधिकारिक धारणा सार्वजनिक गरेको हो।
नारायण अवस्थी दिनेश खबरका सहायक सम्पादक हुन्। उनले शिक्षा, स्वास्थ्य र कृषि विषयमा कलम चलाउछन्।