दुई किलोग्राम सुनसहित एक जना पक्राउ

रसुवामा एक जना दुई किलोग्राम सुनसहित पक्राउ परेका छन्।

जिल्लाको कालिका गाउँपालिका–१ ग्राङबाट सुनजस्तो देखिने धातु करिब २ किलोग्रामसहित गोसाईकुण्ड गाउँपालिका–३ ब्रिद्धिमका ३४ वर्षीय कर्मा सोनाम लामालाई बिहीवार बेलुकी प्रहरीले पक्राउ गरेको हो।

अस्थायी प्रहरी पोष्ट ग्राङबाट खटिएको प्रहरीले कालिकातर्फ जाँदै गरेको बागमती प्रदेश ०२–०४३ प २४३४ नम्बरको मोटरसाइकललाई जाँच गर्ने क्रममा मोटरसाइकलमा सवार लामाले लगाएको दुवै जुत्ताभित्र लुकाई छिपाई ल्याएको उक्त धातु फेला पारी पक्राउ गरेको हो। यस सम्बन्धमा प्रहरीले आवश्यक अनुसन्धान गरिरहेको जनाएको छ।