कैलालीमा लागूऔषधसहित दुई जना पक्राउ

धनगढीः कैलालीमा लागूऔषधसहित दुई जना पक्राउ परेका छन्। गोदावरी नगरपालिका-५ गेटा आँखा अस्पताल नजिकबाट ८६० ग्राम लागूऔषध (चरेस)सहित सोही ठाँउका ४५ वर्षीय रामनाथ राना मंगलवार पक्राउ परेका हुन्।

बिशेष सूचनाको आधारमा सुदूरपश्चिम प्रदेश प्रहरी कार्यालय धनगढी र प्रहरी चौकी गेटाबाट खटिएको संयुक्त प्रहरी टोलीले रानालाई पक्राउ गरेको हो। रानाले चलाएको मोटरसाईकलको लेगगार्डमा सेतो कट्टा भित्र लुकाई राखेको अबस्थामा चरेस फेला पारी मोटरसाईकल र उनलाईे पक्राउ गरेको प्रहरीले जनाएको छ।

यस्तै गोदावरी नगरपालिका-२ अत्तरिया स्थित महेन्द्रनगर रोडबाट ५६० मिलिग्राम लागूऔषध (खैरो हेरोइन)सहित गोदावरी-३ का २५ वर्षीय सुरेन्द्र साउँद मंगलवार साँझ पक्राउ परेका हुन्। इलाका प्रहरी कार्यालय मालाखेतीबाट खटिएको प्रहरी टोलीले साउँदलाई खैरो हेरोइनसहित पक्राउ गरेको हो। यस सम्बन्धमा प्रहरीले थप अनुसन्धान गरिरहेको जनाएको छ।