धनगढीमा सिकलसेल परीक्षणको निःशुल्क शिविर सञ्चालन
धनगढीः कैलालीको धनगढीमा सिकलसेल परिक्षणको निःशुल्क शिविर सञ्चालन गरिएको छ। जिल्लाको सेती प्रादेशिक अस्पतालले निः शुल्क सिकलसेल एनिमिया तथा थाइलेसिमिया परीक्षणका लागि शिविर सञ्चालन गरेको हो।
प्रादेशिक अस्पतालले धनगढी उपमहानगरपालिका वडा नम्बर १६ घसिटामा निःशुल्क परीक्षण शिविर सञ्चालन गरेको छ। विशेष गरी थारू समुदायमा देखिने यो रोग बढी प्रभावित क्षेत्र आँकलन गरेर शिविर सञ्चालन गरिएको सेती प्रादेशिक अस्पतालका निमित्त प्रमुख मेडिकल सुरिटेन्डेन्ट डाक्टर शेरबहादुर कमरले बताए। उनले भने, ‘यो रोग एक पुस्ताबाट अर्को पुस्तामा सर्दै जाने र यसबाट थारु समुदाय बढी प्रभावित छन। सिकलसेल एनिमिया वंशाणुगत रोग हो।’ सिकलसेल आमाबुवा दुवैमा छ भने उनीहरुबाट जन्मिएका सबै सन्तानमा हुने सम्भावना बढी हुने उनले बताए।
‘यो रोग ९९ प्रतिशत थारू समुदायमा देखिने गरेको छ’, उनले भने, ‘थारू समुदायका शङ्का लागेका सबै उमेर समूहकाले शिविरमा रगत परीक्षण गर्न सक्नुहुन्छ। अन्य समुदायका मान्छेमा पनि शङ्का लागेको छ भने परीक्षण गर्न सक्नुहुन्छ।’
सेती अस्पतालमा पनि हाल सिकलसेलको निःशुल्क परीक्षण हुने गरेको उनले बताए। अस्पतालमा हालसम्म नौ सय १४ जना सिकलसेल एनिमियाका बिरामी दर्ता भएका छन्। अस्पतालका सामाजिक सेवा इकाइ प्रमुख गौरीदत्त जोशीले भने, ‘आर्थिक वर्ष २०७१/७२ बाट यो कार्यक्रम सुरु भएको हो। हालसम्म कैलाली र कञ्चनपुरका गरी नौ सय १४ बिरामी दर्ता भएका छन्।’ दर्ता भएका सबै बिरामीले औषधि सेवन गरिरहेको उनको भनाइ छ। उनले भने, ‘औषधि फरक–फरक हुन्छ। दुखाइको औषधि सबैले सेवन गरिरहेका हुन्छन्।’
थारू समुदायलाई लक्षित गरेर शिविर सञ्चालन गरिएको अस्पताल व्यवस्थापन समितिका अध्यक्ष नरबहादुर शाहले बताए। उनले भने, ‘यो थारु समुदायमा बढी देखिने रोग हो। जो अस्पतालसम्म आउन नसक्ने छन्, उहाँहरुको समुदायस्तरमै गएर जाँच गर्ने हाम्रो योजना हो।’
आगामी दिनमा जिल्लाका अन्य ग्रामीण क्षेत्रमा पनि यसरी नै शिविर सञ्चालन गरिने उनको भनाइ थियो। प्रदेश सरकारको सहयोग तथा धनगढी उपमहानगरपालिकाको समन्वय र सहकार्यमा २ दिने शिविर सञ्चालन गरिएको अध्यक्ष शाहले बताए। उनका अनुसार शिविर माघ ७ गते (आइतवार) वडा नं. १७ धुर्जन्नामा सञ्चालन हुनेछ।
