कैलालीमा शनिवार लागुऔषधसहित चार जना पक्राउ

धनगढीः कैलालीमा लागुऔषधसहित चार जना पक्राउ परेका छन। सुदूरपश्चिम प्रदेश प्रहरीका अनुसार शनिवार मात्र जिल्लाका चार जना युवा लागुऔषधसहित पक्राउ परेका हुन्। 

प्रहरीका अनुसार धनगढी उपमहानगरपालिका वडा नम्बर २ त्रिनगर ब्यारेलबाट २९ वर्षीय दिपक राना पक्राउ परेका छन। धनगढी उपमहानगरपालिका वडा नम्बर ५ का राना एक ग्राम ३३० मिलिग्राम लागुऔषधसहित पक्राउ परेका हुन्। उनले मोटरसाइकलको ऐना भित्र लागुऔषध लुकाएका थिए। जिल्ला प्रहरी कार्यालय कैलाली र प्रहरी चौकी त्रिनगरको प्रहरी टोलीले मोटरसाइकलसहित उनलाई पक्राउ गरेको हो।

यता कैलालीको गोदावरी नगरपालिका वडा नम्बर २ अत्तरियाबाट आठ सय २० मिलिग्राम लागुऔषधसहित तीन जना पक्राउ परेका छन। प्रहरीका अनुसार सोही ठाउँका २७ वर्षीय तेजबहादुर खड्का, २५ वर्षीय कुमार खड्का र २६ वर्षीय राज खत्री लागुऔषधसहित पक्राउ परेका हुन्। शनिवार साँझ ईलाका प्रहरी कार्यालय मालाखेतीको  प्रहरी टोलीले उनीहरुलाई पक्राउ गरेको हो।