बैतडीमा ई–पासपोर्ट सेवा बन्द, सेवाग्राही मारमा
बैतडीः बैतडीमा विद्युतीय राहदानी (ई–पासपोर्ट) सेवा बन्द भएको छ। मंगलबारदेखि सर्भरमा समस्या आएका कारण विद्युतीय राहदानी सेवा बन्द भएको हो।
जिल्ला प्रशासन कार्यालयले सूचना जारी गर्दै अर्को व्यवस्था नहु्न्जेलसम्म सेवा बन्द भएको जनाएको छ। विद्युतीय राहदानी इनरोलमेन्ट तथा जारी गर्न विद्युतीय राहदानी सर्भर कनेक्सनमा समस्या आएको भनेर राहदानी विभागबाट जानकारी आएको जिल्ला प्रशासन कार्यालयका प्रशासकीय अधिकृत शंकर बोहराले बताए।
यहाँको सर्भरको कनेक्सन केन्द्रको सर्भरसँग नभएकाले सेवा अवरुद्ध भएको हो। बन्द भएको विद्युतीय राहदानी सेवा फेरि सञ्चालन हुन केही दिन लाग्नसक्ने जनाइएको छ।
विद्युतीय राहदानी सेवा बन्द हुँदा सेवाग्राही समस्यामा परेका छन्। यसअघि गत असारमा पनि यही समस्याले केही दिन विद्युतीय राहदानी सेवा बन्द भएको थियो। बैतडीमा गत जेठ १२ गतेदेखि विद्युतीय राहदानी सेवा दिन शुरु गरिएको हो।
