पुनर्वासको मेयरका लागि नेकपा (एस)द्वारा ४ जनाको नाम सिफारिस

कञ्चनपुर: कञ्चनपुरको पुनर्वास नगरपालिकाको प्रमुखको उम्मेदवारका लागि नेकपा एकीकृत समाजवादीले ४ जनाको नाम सिफारिस गरेको छ। बुधबार बसेको  बैठकले पुनर्वास नगरप्रमुखका लागि ४ जना र उपप्रमुखका लागि ३ जनाको नाम सिफारिस गरेको हो।

मेयर पदमा आरपी सार्की, स्थिर प्रसाद घिमीरे, पूर्णा कुमारी गुरुङ र जीवनराज थापाको नाम  सिफारिस भएको छ। त्यस्तै उपप्रमुखमा टेकबहादुर थापा, पार्वती हमाल र दिलिप तामाङको नाम सिफारिस भएको एकीकृत समाजवादी पार्टी पुनर्वास नगर कमिटीले जनाएको छ। 

गठबन्धन हुने पक्का भएपछि पुनर्वास नगरपालिकामा मेयर पद एकीकृत समाजवादीको भागमा पर्ने निश्चित छ। ४ जनामध्ये मेयर पदमा पुनः अहिलेकै मेयर जिवनराज थापाकै चर्चा बढी सुनिने गरेको छ। उनी एकीकृत समाजवादीका जिल्ला अध्यक्ष पनि हुन्। त्यसैले पनि उनी मेयरमा दोहोरिने सम्भावना बढी देखिन्छ।