क्रिकेटका सुपरस्टार अफ्रिदीले काठमाडौंबाट इपिएल खेल्ने
काठमाडौंः विश्व क्रिकेटका सुपरस्टार अलराउन्डर तथा पाकिस्तानका पूर्व कप्तान शाहिद अफ्रिदीले चौथो संस्करणको एभरेष्ट प्रिमियर लिग इपिएलकाठमाडौं किंग्स एलेभेनबाट खेल्ने भएका छन्। चौथो संस्करणको इपिएल आगमी असोज ९ देखि २३ सम्म टियु मैदानमा हुनेछ।
काठमाडौंले सोमबार विदेशी खेलाडीको रुपमा अफ्रिदीको नाम सार्वजनिक गरेको छ। अफ्रिदी नेपाल आउन लागेका सर्वाधिक ठूला नामका अलराउन्डर हुन्। ४१ वर्षिय अफ्रिदी विश्व क्रिकेटकै एक उत्कृष्ट अलराउन्डरमा पर्दछन्। उनलाई बुम बुम अफ्रिदी पनि भन्ने गरिन्छ। अफ्रिदी ठूला सर्ट र स्पिन बलिङका लागि परिचित नाम हुन्। ४१ वर्षिय अफ्रिदीले पाकिस्तानबाट २७ टेस्ट, ३ सय ९८ ओडिआई, ९९ टि२० आई र ३ सय २६ टि२० खेल खेलेका छन्।
अफ्रिदीले सन् १९९६ मा केन्याविरुद्ध ओडिआईमा डेब्यू गर्दै अन्तर्राष्ट्रिय क्रिकेट यात्रा अघि बढाएका थिए। अफ्रिदीले ओडिआईमा ८ शतक र ३९ अर्धशतक सहित कुल ८ हजार ६४ रन बनाएका छन्। ओडिआईमा अफ्रिदीले ३ सय ९५ विकेट लिएका छन्। उत्कृष्ट प्रदर्शन ७–१२ छ । टि२० आई अफ्रिदीले २००६ मा इंग्ल्यान्डविरुद्ध डेब्यू गरेका थिए। अफ्रिदीले टि२० मा १ हजार ४ सय १६ रन बनाउँदा ९८ विकेट लिएका छन्।
ओडिआईमा उनले १९९६ मा श्रीलंकाविरुद्ध ३७ बलमा शतक प्रहार गरेका थिए । जुन खेलमा अफ्रिदी ओडिआईमा शतक प्रहार गर्ने सर्वाधिक कान्छा खेलाडी बनेका थिए। उनले १६ वर्ष २ सय १७ दिनमा श्रीलंकाविरुद्ध शतक बनाउँदै कीर्तिमान कायम गरेका थिए। ओडिआईमा सर्वाधिक छिटो शतक बनाउने कीर्तिमान एवि डिभिलियर्सको नाममा ३१ बलमा वेस्टइन्डिजविरुद्ध छ। वेस्टइन्डिजविरुद्ध २०१३ मा ९ ओभरमा १२ रन खर्चेर ७ विकेट लिएका थिए।
जुन श्रीलंका चामिन्डा भासको ८–१९ पछि सिमित ओभरको उत्कृष्ट प्रदर्शन हो। २००९ को टि२० विश्वकप जिताउन अफ्रिदीले फाइनलमा श्रीलंकाविरुद्ध ५४ रनको अर्धशतकीय इनिङ खेलेका थिए। २००७ को टि२० विश्वकपमा अफ्रिदी सर्वोत्कृष्ट खेलाडी चुनिएका थिए। २०१६ पछि अफ्रिदीले अन्तर्राष्ट्रिय क्रिकेटबाट सन्न्यास लिएका थिए । फ्रेन्चाइज लिग भने निरन्तर खेल्दै आएका छन्। अफ्रिदीसँग झन्डै दुई दर्जन टि२० लिगको अनुभव छ।
काठमाडौंले गतवर्ष केभिन ओ ब्रायन र न्युजिल्यान्डका कोरी एन्डरसनको नाम सार्वजनिक गरेको थियो। कोरीले न्युजिल्यान्ड छाडि सकेका छन्। अमेरिकाबाट खेल्ने तयारी गरि रहेका छन्। केभिन र कोरी यो वर्ष आउने वा नआउने निश्चित भने छैन। त्यस्तै गतवर्ष वेस्टइन्डिजका स्टार अलराउन्डर कार्लोस व्रेथवेट र ओमानका अकिब इलायसको नाम पनि चर्चामा थियो।
गतवर्ष पोखरा टाइगर्सले वेस्टइन्डिज तथा विश्व टि२० क्रिकेटका राजा मानिने क्रिस गेलको नाम सार्वजनिक गरेको थियो। गेल इपिएलमा सार्वजनिक भएका सर्वाधिक ठूला नाम हुन्। तर उनी आगमी अक्टोबर नोभेम्बरमा हुने टि२० विश्वकपको कारण इपिएल खेल्न आउने सम्भावना निकै कम छ।
काठमाडौंमा सन्दीप लामिछाने, दीपेन्द्र सिंह ऐरी, जितेन्द्र कुमार मुखिया, अमित श्रेष्ठ, राजु रिजाल, मोहम्मद साम्सद शेख, अमर सिंह राउटेला, सुवास खकुरेल, आकाश चन्द, अमृत भट्टाई, शेर मल्ल, सागर पुन र दीपेन्द्र रावत लगायतका खेलाडी छन्।
