Covid-19(Coronavirus) update
World Nepal
Confirmed
Recovered
Deaths

चितवन मेडिकल कलेजमा ३० श्ययाको कोभिड आइसियू

रासस
२०७७ असार १४, ०६:०२
अ+

चितवन मेडिकल कलेजले ३० श्ययाको कोभिड–१९ सघन उपचार कक्ष स्थापना गरेको छ। कोरोना सङ्क्रमण भएकाहरूको उपचारका लागि अस्पतालले सघन उपचार कक्ष स्थापना गरेको हो। सो कक्षको आज रोटरी इन्टरनेशनल वर्ष २०२१/२२ का प्रेसिडेन्ट शेखर मेहता, डिष्ट्रिक्ट ३२९२ का गभर्नर किरणलाल श्रेष्ठ र प्रमुख जिल्ला अधिकारी नारायणप्रसाद भट्टराईले उद्घाटन गरेका हुन्। मेहताले सामाजिक सञ्जालमार्फत सम्बोधन गरेर र श्रेष्ठ एवं भट्टराई प्रत्यक्ष उपस्थित भएर उद्घाटन गरेका हुन्।

कलेजका अध्यक्ष एवं प्रबन्ध निर्देशक प्राडा हरिशचन्द्र न्यौपानेले ३० श्यया भेन्टिलेटरसहितको सुविधासम्पन्न सघन उपचार कक्ष हुने बताए। भेन्टिलेटरमा रोटरी फाउन्डेशनले सहयोग गरेको हो। न्यौपानेका अनुसार यो सघन उपचार कक्ष कोभिड–१९ उपचारका लागि नेपालकै सबैभन्दा ठूलो र सुविधासम्पन्न हुनेछ। हाल चारवटा भेन्टिलेटर भए पनि १५ दिनभित्र ३० वटै भेन्टिलेटर आइपुग्नेछ। 

स्वास्थ्य मन्त्रालयमा कोभिड–१९ उपचारका लागि अनुमति माग गरिएको भन्दै उनले पिसिआर प्रयोगशालासमेत तयारी अवस्थामा रहेको बताए। मन्त्रालयले अनुमति दिएसँगै सघन उपचार कक्ष र प्रयोगशाला सञ्चालनमा आउने उनको भनाइ छ। अस्पतालले पाँच करोड खर्च गरेर प्रयोगशाला तयारी गरेको होे भने कोभिड–१९ सघन उपचार कक्षका लागि २५ करोड हाराहारी खर्च भएको उनले बताए।

सोही मेडिकल कलेजका प्राविधिकहरूले अहिले पनि भरतपुर कोभिड–१९ प्रयोगशालामा काम गरिरहेका छन्। यस मेडिकल कलेजले भरतपुर कोरोना अस्पताल, माडी र भरतपुर महानगरपालिका–५ मा श्यया उपलब्ध गराएर सहयोग गरेको छ।