धनगढीको नवजीवन अस्पतालद्वारा रसुवा बाढीपीडितका लागि २ लाख २२ हजार सहयोग
२०८३ भदौ ११, १२:५३
धनगढीः धनगढीस्थित नवजीवन अस्पताल प्रालिले रसुवाका बाढी प्रभावितका लागि आर्थिक सहयोग गरेको छ।
अस्पतालले बाढी प्रभावितको राहत तथा उद्धारका लागि प्रधानमन्त्री दैवी प्रकोप उद्धार कोषमा २ लाख २२ हजार २ सय २२ रुपैयाँ सहयोग रकम जम्मा गरेको हो।
अस्पतालका कार्यकारी निर्देशक चक्र खडायतले सामाजिक उत्तरदायित्वअन्तर्गत बाढी प्रभावित नागरिकको सहयोगका लागि उक्त रकम कोषमा जम्मा गरिएको जानकारी दिए।
उनका अनुसार अस्पतालले बुधबार प्रधानमन्त्री दैवी प्रकोप उद्धार कोषमा रकम जम्मा गरेको हो।
अस्पतालले रसुवामा आएको विनाशकारी बाढीमा परी घाइते भएकाहरूको शीघ्र स्वास्थ्यलाभको कामना गरेको छ। साथै बाढीमा ज्यान गुमाएकाप्रति दुःख व्यक्त गर्दै श्रद्धाञ्जली अर्पण गरेको अस्पतालले जनाएको छ।
सम्पर्कविहीन भएका नागरिकहरू सकुशल फेला परून् भन्ने कामनासमेत अस्पतालले गरेको छ।
कमेन्ट लोड गर्नुस