सुदूरपश्चिम विश्वविद्यालयका विद्यार्थीले अब डिजिटल प्रणालीबाटै एनओसी पाउने

धनगढीः सुदूरपश्चिम विश्वविद्यालयबाट अध्ययन सम्पन्न गरेका विद्यार्थीले विदेश अध्ययनका लागि आवश्यक नो अब्जेक्सन सर्टिफिकेट (एनओसी) अब डिजिटल प्रणालीमार्फत प्राप्त गर्ने भएका छन्।

यससम्बन्धी द्विपक्षीय समझदारीपत्रमा सुदूरपश्चिम विश्वविद्यालय र शिक्षा तथा खेलकुद मन्त्रालयबीच हस्ताक्षर भएको छ।

समझदारीपत्रमा सुदूरपश्चिम विश्वविद्यालयका उपकुलपति प्रा.डा. किसनदत्त भट्ट र शिक्षा तथा खेलकुद मन्त्रालयका सहसचिव श्रीप्रसाद भट्टराईले हस्ताक्षर गरेका छन्।

समझदारीअनुसार विश्वविद्यालयको शैक्षिक सूचना प्रणाली र मन्त्रालयको एनओसी प्रणालीबीच डिजिटल माध्यमबाट तथ्याङ्क आदान–प्रदान हुने व्यवस्था गरिनेछ।

नयाँ व्यवस्थाले एनओसी लिन विद्यार्थीले भोग्दै आएको झन्झट कम हुनुका साथै सेवा छिटो, सहज, सुरक्षित र पारदर्शी हुने विश्वास गरिएको छ।