खानेपानी अभाव भएपछि धनगढी–१२ को शिविर क्षेत्रमा पानी वितरण

धनगढीः लामो समयदेखि वर्षा नपर्दा खानेपानीका स्रोत सुकेपछि धनगढी उपमहानगरपालिका–१२ को शिविर क्षेत्रमा उपमहानगरपालिकाले खानेपानी वितरण गरेको छ।

वडा नम्बर १२ का विभिन्न धाराहरू सुकेर घरायसी प्रयोजनका लागि आवश्यक पानीको अभाव भएपछि उपमहानगरपालिकाले पानी बोक्ने साधनमार्फत प्रभावित क्षेत्रमा खानेपानी उपलब्ध गराएको हो।

उपमहानगरपालिकाले शिविर क्षेत्रका बासिन्दालाई दैनिक आवश्यकताका लागि पानी वितरण गरेको जनाएको छ। पानी वितरण भएपछि स्थानीयवासीलाई तत्काल राहत पुगेको छ।

धनगढी उपमहानगरपालिकाले खानेपानीको समस्या देखिएका अन्य स्थानमा पनि आवश्यकताअनुसार पानी वितरण गर्दै नागरिकलाई सहज सेवा उपलब्ध गराउने जनाएको छ।