स्वास्थ्य बिमा भुक्तानीमा सुधार: सरकारले एक अर्ब तीन करोड रुपैयाँ अस्पतालहरूलाई निकासा गर्यो
काठमाडौँ: विगतका वर्षहरूमा स्रोत अभावका कारण स्वास्थ्य बिमा भुक्तानीमा देखिएको समस्या क्रमशः समाधानतर्फ उन्मुख भएको छ। सरकारले पछिल्लो एक हप्तामा स्वास्थ्य बिमाबापत एक अर्ब तीन करोड रुपैयाँ देशभरका स्वास्थ्य संस्थाहरूको खातामा निकासा गरेको छ।
यस रकमबाट १५५ सरकारी, २५ सामुदायिक र ३७ निजी अस्पताल लाभान्वित भएका छन्। अघिल्लो आर्थिक वर्षको बक्यौता रकमसमेत समेटेर विभिन्न चरणमा भुक्तानी गरिएपछि स्वास्थ्य बिमा कार्यक्रमसँग सम्बन्धित आर्थिक समस्या केही हदसम्म सहज बनेको छ।
स्वास्थ्य बिमा बोर्डका वरिष्ठ मेडिकल सुपरिटेन्डेन्ट डा. पवन शाहका अनुसार यसअघि सरकारी अस्पतालमा उपचार गराउने बिरामीका लागि मात्र बिमा रकम भुक्तानी गरिँदै आएको थियो। तर पछिल्लो चरणमा निजी स्वास्थ्य संस्थामा उपचार गराउने सेवाग्राहीका लागि पनि भुक्तानी गरिएको छ।
स्वास्थ्य बिमा कार्यक्रमको दिगोपन सुनिश्चित गर्न सरकारले चालु आर्थिक वर्षका लागि १५ अर्ब रुपैयाँ विनियोजन गरेको छ। साथै, उपलब्ध स्रोतको दायराभित्र रहेर बिमा विस्तार गर्ने, अस्पतालहरूको सेवा तथा खरिद प्रक्रियामा कडा अनुगमन गर्ने लगायतका उपाय अपनाइने जनाइएको छ।
स्वास्थ्य तथा खाद्य स्वच्छता मन्त्री निशा मेहताले स्वास्थ्य बिमा जस्तो महत्वपूर्ण सामाजिक सुरक्षा कार्यक्रमलाई प्रभावित हुन नदिन सरकारले बक्यौता भुक्तानीलाई निरन्तरता दिने बताए। भविष्यमा यस्ता समस्या दोहोरिन नदिन कार्यक्रमको निगरानी र नियमन थप प्रभावकारी बनाइने उनको भनाइ छ।
