बालेन शाह सुदूरपश्चिममा, यस्तो छ कैलाली र कञ्चनपुरको तालिका
धनगढी: राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह (बालेन) ‘जनसम्पर्क तथा अभिवादन अभियान’ का लागि सुदूरपश्चिम भ्रमणमा छन्।
नेता शाहले आज एकैदिन कैलाली र कञ्चनपुरका विभिन्न स्थानमा पुगेर सर्वसाधारणसँग भेटघाट र अन्तर्क्रिया गर्ने कार्यक्रम रहेको छ ।
सार्वजनिक गरिएको कार्यतालिका अनुसार अभियानको सुरुवात आज बिहान ७ बजे कैलालीको राजापुरबाट भएको छ। त्यहाँ स्वागत तथा अभिवादन कार्यक्रम सकिएपछि उनी आजै टिकापुर पुगेका थिए।
बिहान ८ देखि ९ बजेसम्म टिकापुर बजारस्थित पार्टी कार्यालय र कुमारी बैंक नजिकै विशेष कार्यक्रम आयोजना गरिएको थियो।
त्यसपश्चात नेता बालेन लम्की बजार, लम्की–बर्दगोरिया, सुखड, पहलमानपुर, मसुरीया र चौमाला हुँदै अत्तरिया हुँदै यो समाचार तयार गर्दा उनी धनगढी-११ घुडसुवामा खाना खाइरहेका छन्।
आजै अत्तरियाको रास्वपा पार्टी कार्यालयमा दिउँसो १ बजे संक्षिप्त भेटघाट कार्यक्रम तय गरिएको छ । दिउँसो २:३० देखि ३:३० सम्म शाह धनगढी बजारमा आयोजित स्वागत तथा अभिवादन कार्यक्रममा सरिक हुनेछन्।
कञ्चनपुरमा तीन ठाउँमा कार्यक्रम हुने
कैलालीको कार्यक्रम सकेर नेता शाह अपराह्न ३:३० बजे कञ्चनपुर प्रस्थान गर्ने छन् । कञ्चनपुरमा उनले पुनर्वास चोक, झलारी र महेन्द्रनगर बजारमा आयोजना हुने कार्यक्रमहरूलाई सम्बोधन गर्ने छन्।
साँझ ६:१० देखि ७:०० बजेसम्म महेन्द्रनगर बजारको घन्टाघर वा मदन चोकमा अन्तिम स्वागत कार्यक्रम राखिएको छ।
दिनभरिको व्यस्त तालिकापछि उनी आज राति कञ्चनपुरमै रात्रि विश्राम गर्ने आयोजकले जनाएको छ । यस अभियानलाई रास्वपाले संगठन विस्तार र जनताको सुझाव संकलन गर्ने महत्वपूर्ण कडीका रूपमा हेरेको छ।
नारायण अवस्थी दिनेश खबरका सहायक सम्पादक हुन्। उनले शिक्षा, स्वास्थ्य र कृषि विषयमा कलम चलाउछन्।