‘दुई वर्षभित्र भूमिहीनको हातहातमा लालपूर्जा दिन्छौँ’

कञ्चनपुर ः नेपाली कांग्रेसका नेता एनपी साउँदले दुई वर्षभित्र भूमिहीनको हातहातमा लालपूर्जा पु–याउने प्रतिबद्धता व्यक्त गरेका छन्।
कञ्चनपुरको शुक्लाफाँटा नगरपालिका–२ रानीपुरमा आयोजित कार्यक्रममा उनले भूमि आयोगका कार्यलाई जनशक्ति थपेर भए पनि तीव्रता दिनुपर्नेमा जोड दिएका हुन्। अव्यवस्थित बसोवासीले तिर्नुपर्ने जग्गाको शुल्क ८० प्रतिशतबाट घटाएर २० प्रतिशतभन्दा कम गरिएको उनले बताए।
शुक्लाफाँटा राष्ट्रिय निकुञ्जको जोनापुर क्षेत्र हुँदै मझगाउँसम्मको पर्यटकीय मार्ग निर्माणका लागि काम अगाडि बढाउन लागिएको उनले बताएका छन्। “यसबारे सम्बन्धित पक्षसँग छलफल भइरहेको छ”, उनल भने, “मार्गको प्रवेश विन्दुमा पर्ने स्याली नदीमा पुलको आवश्यकता छ।”
पूर्वमन्त्री समेत रहेका उनलाई स्थानीय बासिन्दाले जङ्गली जनावरको आतङ्क रोक्न मेसवायर जडान, सनवोरा र स्याली नदीमा तटबन्ध निर्माण, सनवोरा नदीमा पक्की पुल निर्माणका लागि पहल गरिदिन आग्रह गरेका थिए।



