साउनको पहिलो सोमवारः शिवालयहरुमा बिहानैदेखि भक्तजनको भीड
साउनको पहिलो सोमवार (आज) शिवालयहरुमा बिहानैदेखि भक्तजनको भीड लागेको छ।
हिन्दुधर्मालम्वीहरुले महिनामा साउन र बारमा सोमवार भगवान् शिवको वार भएकाले यस दिनमा शिवजीको पूजा आराधना एवम् दर्शन गर्नाले मनोकामना पूरा हुन्छ भन्ने धार्मिक विश्वासमा शिवको मन्दिरहरुमा भक्तजनको भीड लागेको हो। साउनको सोमवार शिवलाई शुद्ध जल चढाएर खुसी बनाउन सकिन्छ भन्ने शास्त्रीय मान्यता छ।
साउनको सोमवार व्रत गरेमा मनको इच्छा पूरा भई अटल सौभाग्य प्राप्त हुने धार्मिक विश्वास छ। भगवान् शिवको आराधनाका लागि विशेष मानिने यस महिनामा भक्तजनहरू हरियो चुरा, माला लगाउने, मेहन्दी लगाउने र व्रत बस्ने परम्परा पालना गर्दै पशुपतिनाथमा पूजा अर्चना गर्न पुग्छन्।
साउनदेखि नै सूर्य दक्षिण हुँदै हिँड्ने भएकाले आजैदेखि दक्षिणायन सुरु हुन्छ। माघ १ गते सुरु हुने उत्तरायण र साउन १ गते सुरु हुने दक्षिणायनका दिनलाई विशेष रूपमा मनाइन्छ।
