सुदूरपश्चिम स्पोट्र्स अवार्डमा दुर्गेश थापाको प्रस्तुति

धनगढी : सुदूरपश्चिम स्पोट्र्स अवार्भमा दुर्गेश थापाको प्रस्तुति रहने भएको छ।

‘छैठौं एसपीए सुदूरपश्चिम स्पोट्र्स अवार्ड, २०८१’ मा थापाले प्रस्तुति दिने भएका हुन्। धनगढी रंगशालामा आज साँझ ५ बजेदेखि कार्यक्रम सुरु हुने आयोजक खेलकुद पत्रकार मञ्चले बताएको छ।

खेलकुद पत्रकार मञ्च कैलालीका अध्यक्ष प्रदीप पाठकले कार्यक्रमको सम्पूर्ण तयारी पूरा भएको बताए। अवार्ड कार्यक्रममा विभिन्न सांगितिक प्रस्तुति रहने छन। दुर्गेश थापाको पनि प्रस्तुति रहने उनले बताए।

कार्यक्रममा मञ्चले ८ विधामा अवार्ड प्रदान गर्नेछ। ६ विधाको मनोनयन सार्वजनिक भइसकेको छ। वर्ष खेलाडी पुरुषको मनोनयनमा खोखोका हेमराज पनेरु, करातेका मोहमद शेखु आलम र भलिबलका अर्जुन नेपाली परेका छन्। वर्ष खेलाडी महिलाको मनोनयनमा खोखोकी मानमती धामी, कबड्डीकी मानमती बिष्ट र बक्सिङकी स्वस्तिका तिरुवा परेका छन्। वर्ष युवा खेलाडीको मनोनयनमा क्रिकेटका नरेन साउँद, फुटबलका निराजन धामी र कबड्डीका, सुशील चुनारा परेका छन्। यस्तै, वर्ष प्रशिक्षकको मनोनयमा कबड्डीकाय विष्णुदत्त भट्ट, भलिबलका जगदीश भट्ट र कबड्डीकै हरिना थापा परेकी छिन्।

सुदूरपश्चिम आइकन पुरुष विधामा कबड्डीका खगेन्द्र जोशी, पौडीका अथर्व सिंह र क्रिकेटका हेमन्त धामी तथा सुदूरपश्चिम आइकन महिला विधामा करातेकी मनिषा बोहरा, कबड्डीकी मनिषा जोशी र क्रिकेटकी, सावित्री धामी मनोनयनमा परेका छन्। स्पेशल अवार्ड र लाइफटाइम एचिभमेन्ट अवार्डका विजेताको नाम भने अवार्डकै दिन घोषणा गरिने छ।

उत्कृष्ट खेलाडी पुरुष र महिला विधाका विजेतालाई ३५–३५ हजार, उत्कृष्ट प्रशिक्षकलाई ३० हजार, वर्ष युवा खेलाडी, स्पेसल अवार्ड र लाइफटाइम एचिभमेन्ट अवार्डका विजेतालाई २५–२५ हजार नगदबाट पुरस्कृत गरिने आयोजक नेपाल खेलकुद पत्रकार मञ्च कैलालीका अध्यक्ष प्रदीप पाठकले जानकारी दिए । उनका अनुसार सुदूरपश्चिम आइकन महिला र पुरुष विधाका विजेतालाई नगद २०–२० हजारसहित ट्रफी प्रदान गरिनेछ।

धनगढी रंगशालमा गएर प्रत्यक्ष रूपमा अवार्ड कार्यक्रम हेर्नका लागि खल्ती एपबाट टिकट काट्न सकिने छ। टिकट शुल्क एक सय रुपैयाँ तोकिएको छ।