कैलालीमा १०३ पूरुषले गरे दोस्रो विवाह, कारबाही गर्न प्रहरीमा उजुरी

धनगढीः कैलालीमा बहुविवाह गर्नेक्रम अझै रोकिएको छैन। दोस्रो विवाह गर्न नपाइने कानुनी व्यवस्था हुँदैहुदै पनि घरकी श्रीमतीलाई परित्याग गर्दै दोस्रो विवाह गर्नेक्रम जारी नै रहेको पाइएको छ।

कैलालीमा एक सय ३ जना पुरुषले दोस्रो विवाह गरेका छन्। यो प्रहरीमा परेको उजुरीको संख्या मात्र हो। दोस्रो विवाह गरेर समाजमै मिलाउने र दोस्रो विवाह गरेर गुपचुपमा बस्नेको भने कुनै लेखाजोखा नै छैन। कानुनले बहुविवाहलाई बन्देज गरेको थाहा हुँदाहुँदै पनि दोस्रो विवाह गर्नेको संख्या बढेको हो।

मुलुकी अपराध संहिताको दफा १७५ को १ ले विवाहित पुरुषले वैवाहिक सम्बन्ध कायम रहेको अवस्थामा अर्को विवाह गर्न हुदैन भनेको छ। सोही दफाको उपदफा २ मा कुनै पुरुष विवाहित हो भन्ने जानीजानी त्यस्तो पुरूषसँग कुनै महिलाले विवाह गर्नुहुँदैन भन्ने कानुनी व्यस्था छ। उक्त कानुन मिचेमा दफा १७५ कै उपदफा ४ अनुसार एक वर्षदेखि पाँच वर्षसम्म कैद र १० हजारदेखि ५० हजारसम्म जरिबाना हुने व्यवस्था छ।

तर यस्तो कानुनी व्यवस्था हुँदाहूँदै पनि तीन वर्षको अवधिमा एक सय ३ जना पुरुषले दोस्रो विवाह गरेको भन्दै पीडित महिलाहरुले प्रहरीमा कारबाहीको माग गर्दै निवेदन नै दर्ता गराएका छन्। प्रहरी कार्यालयको तथ्यांक अनुसार आर्थिक वर्ष २०७८/७९ मा ४१, २०७९/८० मा ३४ र आर्थिक वर्ष २०८०/८१ मा २८ वटा बहुविवाहका मुद्दा दर्ता भएका छन्।

समाजमा बहुविवाहका घटना धेरै हुने गरेको भए पनि प्रहरीमा थोरै मात्र मुद्दा दर्ता हुने गरेको पाइएको छ। कानुनले बहुविवाहलाई दण्डनीय अपराध मानेको छ। मुलुकी अपराध संहिता २०७४ ले बहुविवाह गर्नेलाई ५ वर्षसम्म कैदको व्यवस्था पनि गरेको छ। तर पनि दोस्रो विवाह गर्नेक्रम रोकिएको छैन।