बेमौसमी काँक्राखेतीबाट तीन महिनामै डेढ लाख आम्दानी
कञ्चनपुरः बेमौसमी काँक्राखेती गरेर कञ्चनपुरको शुक्लाफाँटा नगरपालिका–३ पिपलाडीका भरत चौधरीले तीन महिनामै एक लाख ५० हजार आम्दानी गरेका छन्।
तीन कठ्ठा जग्गामा चौधरीले काँक्राखेती गरेका छन्। हालसम्म २१ क्विन्टल काँक्रा बिक्री गरेको चौधरीले बताए। काँक्रा प्रतिकिलो ७० देखि ८० मा बिक्री हुँदै आएको छ। काँक्रा रोप्नेदेखि टिपेर बजारसम्म लैजाने कार्यमा चौधरी खटिँदै आएका छन्। बारीमा उत्पादित काँक्रा स्थानीय झलारी, कलुवापुर र अत्तरियालगायत बजारमा बिक्री हुने गरेको छ।
अझै बारीमा एक लाख मूल्य बढीका काँक्रा बिक्री गर्न बाँकी रहेको उनले बताए। गत वर्ष उनले दुई लाख मूल्यका बेमौसमी काँक्रा बिक्री गरेका थिए। पिपलाडी गाउँमा व्यावसायिक तरकारीखेतीमा धेरै किसान भए पनि बेमौसमी काँक्रा उत्पादन गर्नेमा चौधरी एक्ला किसानका रुपमा रहेका छन्। बेमौसमी काँक्राखेती गरेर बजार मूल्य पनि बढी पाइने र बजारमा सहजै बिक्री गर्न सकिने भएकाले यस खेतीलाई दुई वर्षदेखि निरन्तर रुपमा गर्दै आएको चौधरी बताए।
भारतीय तरकारीखेती गर्ने व्यक्तिहरुबाट चौधरीले बेमौसमी तरकारीखेती गर्ने तौरतरिका सिकेको बताए। काँक्रासँगै चौधरीले लौका, भन्टा, खुर्सानी, तितेकरेला, चिचिण्डा, धनियाँ, आलु, लसुन, काउली, बोडीलगायतको खेती गर्दै आएका छन्। काँक्राखेतीबाट तीन लाख र अन्य तरकारीखेती गरी वर्षमा उहाँले ७ लाखदेखि १० लाखसम्मको आम्दानी गर्दै आएका छन्।
तरकारीखेती गरी आएको आम्दानीबाट चौधरीले छोरालाई काठमाडौँमा डेरामा राखेर मेकानिकल इञ्जिनियर पढाउँदै आएका छन्। उनले छोरीलाई महेन्द्रनगरमा कम्प्युटर विज्ञानको पढाइ गराउँदै आएका छन्। पिपलाडी गाउँमा तरकारीखेतीमा ५० बढी परिवार संलग्न छन्। त्यसमध्ये चौधरीलाई अधिक आम्दानी गर्ने किसानमा गणना गरिन्छ। चौधरीले एक दशकअघिदेखि तरकारीखेतीमा संलग्न रहँदै आएका छन्। व्यावसायिक खेतीमा संलग्न रहँदै आएका चौधरीले भने अहिलेसम्म अनुदानका कुनै पनि कार्यक्रममा समावेश हुन नपाएको गुनासो गरेका छन्।
