धनगढीमा ट्रक र मोटरसाइकल ठोक्किँदा दुर्घटना

धनगढीः कैलालीमा ट्रक र मोटरसाइकल ठोक्किएर दुर्घटना भएको छ।

जिल्लाको धनगढी उपमहानगरपालिका–४ बोराडाडी चोकमा सुदूरपश्चिम प्रदेश ०१–०१ ख २७८१ नम्बरको ट्रक र से ७ प ६०८३ नम्बरको मोटरसाइकल एकआपसमा ठोक्किएका छन्।

अत्तरियाबाट धनगढीतर्फ आइरहेको ट्रक र सोही दिशा तर्फ आइरहेको मोटरसाइकल एक आपसमा ठोक्किँदा मोटरसाइकल चालक समिर चौधरी घाइते भएका छन्। उनको स्वस्तिक अस्पतालमा उपचार भइरहेको छ। ट्रक चालक दिपक बोहरालाई नियन्त्रणमा लिएको प्रहरीले जनाएको छ।