कैलालीको बर्दगोरियामा खानेपानीका लागि विश्व बैँकको ७० करोड लगानी

धनगढीः  कैलालीको बर्दगोरिया गाउँपालिकामा विश्व बैँकले खानेपानीमा ७० करोड लगानी गर्ने भएको छ। गाउँपालिकामा खानेपानी आयोजना निर्माणका लागि सम्झौता भएको हो।

विश्व बैँकको लगानीमा सङ्घीय सरकारले खानेपानी आयोजना निर्माण गर्ने गरी सम्झौता भएको छ। ८० प्रतिशत स्थानीयलाई खानेपानी पहुँचभित्र समेट्न विश्व बैँकको लगानीमा आयोजना निर्माणको प्रक्रिया अघि बढाइएको छ। आगामी दुई वर्षभित्रै खानेपानीको पहुँच विस्तार हुने गाउँपालिकाको दाबी छ।

गाउँपालिकामा अहिले सडकपुर–बौकिया र रानीकुन्ठा–खानेपानी आयोजना छन्। सडकपुर–बौनिया खानेपानी आयोजनामार्फत बौनिया बजार क्षेत्रका चार सय परिवारले शुद्ध खानेपानी पाएका छन्। रानीकुन्ठा खानेपानी आयोजनाको लाइन विस्तारको काम भने सकिएको छैन। सडकपुर बौनिया ३५० घनमिटर र रानीकुन्ठा २५० घनमिटरका ओभरहेड टँकीसहितको खानेपानी आयोजना सञ्चालनमा छन्। बन्द रहेको खानेपानी आयोजना मर्मत गरेर गाउँपालिकाले धारामार्फत शुद्ध खानेपानी वितरण गरेको छ। गाउँपालिकाका अध्यक्ष कर्ण कुँवरले चार वर्ष बन्द भएको खानेपानी सुरु गरिएको बताए। उनले भने, ‘हामीले चार सय घरमा धारा वितरण गरेका छौ। विश्व बैँसँग ७० करोडको सम्झौता गरेका छौ। वडा नम्बर ३ मा अर्काे वर्ष पूरा हुन्छ। दुई वर्षमा सबै वडामा खानेपानी हुन्छ।’

बर्दगोरियाका २० प्रतिशत परिवार अहिलेसम्म शुद्ध खानेपानीको पहुँचभित्र छन्। गाउँपालिकाको वडा नम्बर १ र ३ का चार सय परिवार मात्र खानेपानीको पहुँचभित्र रहेको पाइएको छ। तर, गाउँपालिकाले २ वर्षभित्र सबै वडामा शुद्ध खानेपानीको पहुँच पुगाउने योजना बनाएको छ। यसका लागि विश्व बैँकले ७० करोड लगानी गर्ने बर्दगोरिया गाउँपालिकाका इन्जिनियर टंकप्रसाद ओझाले बताए। उनले भने, ‘चारवटा योजना निर्माणको चरणमा छन्। विश्व बैँकले पनि लगानी गर्ने भएको छ। खानेपानी आयोजनाका लागि सर्भेको काम हुँदैछ।’

गाउँपालिकाले अबको २ वर्षमा ६ वटै वडाका घरहरूमा शुद्ध खानेपानीका धारा विस्तार गर्ने लक्ष्य लिएको छ। विश्व बैँकसँगको सम्झौतापछि परामर्शदाता कम्पनीले अध्ययनको काम गर्दै छ। परामर्शदाताको काम सकिएपछि खानेपानी आयोजना निर्माणका लागि ठेक्का सम्झौताको काम हुने छ। ठेक्का मार्फत २ वर्षमा गाउँपालिका भित्रका सबै घरहरूमा शुद्ध खानेपानीको धाराहरू जडान गरिने छन्। विश्व बैँक र गाउँपालिकाको बिचमा पाँच वर्षमा खानेपानी आयोजना निर्माणको सम्झौता भएको थियो। गाउँपालिकाका अध्यक्ष कुँवरले वडा नम्बर ३, ५ र ६ मा पाटीको ट्याङ्की रहेको बताए।

गाउँपालिकाले २ र सुदूरपश्चिम प्रदेश सरकारले २ आयोजना बर्दगोरियामा निर्माण गर्दै थिए। गाउँपालिकाले एक आयोजनाको काम पूरा गरेको छ। एक आयोजना निर्माणको चरणमा छ। तर, विश्व बैँकसँग खानेपानी आयोजना निर्माणको सम्झौता भएपछि प्रदेश सरकारका आयोजनाहरू भने खारेजी भएका छन्।